Policia e Shtetit ka bërë apel pas denoncimeve të shumta për mesazhe mashtruese që pretendojnë ekzistencën e gjobave ose detyrimeve administrative të papaguara. Sipas njoftimit zyrtar, qytetarë kanë marrë SMS që kërkonin pagesa për masa të supozuara administrative; pas denoncimeve, Hetimi i Krimit Kibernetik nisi verifikimet dhe hetimet për identifikimin e autorëve.
Policia sqaron se bëhet fjalë për një skemë të njohur si “Smishing”, ku dërgohen mesazhe që pretendojnë gjoba rrugore, detyrime financiare ose procedura administrative në pritje. Mesazhet përmbajnë lidhje që të çojnë në faqe interneti të rreme, të ndërtuara për t’u ngjasuar me platforma zyrtare të institucioneve shtetërore. Hetimet paraprake tregojnë se qëllimi i autorëve është marrja e të dhënave personale dhe bankare të qytetarëve, të cilat më pas mund të shfrytëzohen për transaksione të paautorizuara dhe përvetësimin e fondeve nga llogaritë bankare.
Policia thekson që vetë marrja e SMS-it nuk e ekspozon direkt llogarinë bankare; rreziku lind kur përdoruesi klikon lidhjen dhe plotëson të dhënat e kartës bankare, kredencialet e internet banking-ut ose kodet e sigurisë të dërguara nga banka. Për këtë arsye, autoritetet u bëjnë thirrje qytetarëve të mos klikojnë në lidhje të dyshimta, të mos japin të dhëna personale apo financiare në faqe të paverifikuara dhe të mos ndajnë me askënd kodet e sigurisë apo autentifikimit.
Policia këshillon që çdo njoftim të verifikohet vetëm përmes kanaleve zyrtare të institucioneve përkatëse. Nëse një qytetar ka plotësuar të dhëna bankare në një faqe të dyshimtë, duhet të kontaktojë menjëherë bankën e tij dhe të njoftojë autoritetet. Monitorimi dhe hetimi i kësaj veprimtarie kriminale vazhdon, ndërsa lufta kundër krimit kibernetik dhe mbrojtja e qytetarëve në hapësirën dixhitale mbeten ndër prioritetet kryesore të Policisë së Shtetit.
