Kryetari i Partisë Demokratike, Sali Berisha, reagoi ndaj deklaratave të kryeministrit Edi Rama dhe ndaj protestave kundër projektit në Zvërnec, duke i cilësuar ato si “protestat më të fuqishme kundër Ramës”. Ai akuzoi Ramën se “firmosi lejen e zhvillimit në prani të konflikteve gjyqësore mes palëve” dhe se përdori monologun e së dielës për të sulmuar, kërcënuar dhe përçmuar protestuesit që kërkojnë dorëheqjen e tij dhe anulimin e vendimeve që, sipas Berishës, rrezikojnë mjedisin dhe dëmtojnë klimën e investimeve në vend.
Berisha vuri theksin te mungesa e transparencës së qeverisë në lidhje me investimet në Zvërnec. Ai deklaroi se, përveç shifrave të mëdha financiare, nuk është dhënë asnjë informacion për pronësinë, për çështjet mjedisore dhe për detyrimet që rrjedhin nga procesi i anëtarësimit të Shqipërisë në Bashkimin Europian, në përputhje me direktivat e Komisionit Europian, përfshirë “Natura 2000”. Sipas tij, Rama nuk dha asnjë shpjegim nëse është kryer vlerësimi strategjik apo vlerësim mjedisor i detyrueshëm për projektin.
Ai akuzoi edhe për mosrespektimin e procedurave, duke theksuar se nuk mund të miratohet leja e zhvillimit pa një projekt apo të paktën një projekt-idee, dhe se kryeministri nuk shpjegoi çfarë direktivash kishte dhënë për përshtatjen me peizazhin. Berisha gjithashtu tha se Rama u përpoq t’i atribuonte protestat forcave të huaja, rikujtoi kohërat e diktaturës dhe “shpiku armiq imagjinarë”, duke përdorur, sipas tij, narrativën e një “luftë hibride” kundër Shqipërisë.
Në fjalimin e tij Berisha akuzoi Ramën për mashtrim dhe cinizëm, duke përmendur edhe pretendimin e kryeministrit se ka marrë kryesinë e shoqatës së pyjeve në Europë, ndërkohë që, sipas Berishës, Shqipëria është vendi me pyjet më të shkatërruara, të djegura dhe të pambrojtura në Europë. Ai përmbylli kritikën duke cilësuar monologun e të dielës si një mashtrim të radhës, të karakterizuar nga cinizmi dhe arroganca ndaj qytetarëve dhe të rinjve në protestë. Përmbajtja e deklaratave u transmetua nga Top Channel.
