Këtë javë Shqipëria u zgjodh me votë unanime në krye të Forest Europe për mandatin 2026–2030, duke marrë stafetën nga Suedia. Platforma paneuropiane përfshin Bashkimin Europian dhe 45 vende, dhe adreson fushën e pyjeve dhe menaxhimin e qëndrueshëm të burimeve natyrore. Kryeministri Edi Rama vuri në dukje se kandidatura shqiptare mori mbështetje të fortë, përfshirë nga Republika Federale e Gjermanisë dhe Mbretëria e Bashkuar.
Rama theksoi se zgjedhja e Shqipërisë në krye të këtij forumi do të dukej e pamendueshme para 10 vjetësh, kur në zonat e mbrojtura zhvilloheshin gjueti e paligjshme dhe flamingot jo vetëm vriteshin, por edhe “haheshin”. Ai kujtoi periudhën kur pyjet priteshin dhe kamionët me dru qarkonin pa kontroll nga veriu në jug, dhe kur zonat e mbrojtura, atëherë shpesh “tokë pa zot”, bëheshin pre e babëzisë. Përmendi gjithashtu se ndërhyrjet e shumta të asaj periudhe rrezikonin lumenjtë, duke shtuar pyetjen retorike se sa hidrocentrale do të ishin ndërtuar në Vjosë nëse nuk do t’i ishte thënë “stop” atyre projektëve.
Rama vuri në dukje se gjatë 10 viteve të fundit Shqipëria ka zgjeruar hartën e zonave të mbrojtura në 25% të territorit. Ai lidh zgjedhjen në krye të Forest Europe dhe përfshirjen e përkrahjes ndërkombëtare me mënyrën e qeverisjes së vendit, duke shtuar se ky transformim tregon se sot qeverisin ata që ndërtojnë dhe harmonizojnë zhvillimin me ruajtjen e mjedisit, dhe jo ata që shkatërrojnë ose abuzojnë me trashëgiminë natyrore dhe kulturore.
Në të njëjtën kohë, Rama njoftoi për një lajm tjetër pozitiv: përfshirjen e liqenit të Shkodrës në biosferën e UNESCO-s. Ai theksoi se burimet natyrore duhet të jenë nën kujdesin dhe përkujdesjen e njerëzve, të ruajtura dhe mirëmbajtura për t’u bërë më të vlefshme dhe për t’i shërbyer rritjes së mirëqenies së njerëzve.
