Imazhi i sulmit të Juventusit po ndryshon pas lajmit se Dusan Vlahovic nuk do të rinovojë kontratën që skadon më 30 qershor. Drejtuesit bardhezi po kërkojnë dy blerje për ta furnizuar repartin ofensiv, pasi disa sulmues kanë situatë të pasigurt: për Milik projektohet një zgjidhje e kontratës, për Opendën po kërkohet një destinacion për huazim, ndërsa për David gjithçka do të varet nga ofertat pas Botërorit. Me vetëm Boga, Yildiz e Conceiçao si alternativa të qarta, ardhja e dy futbollistëve bëhet e domosdoshme.
Një emër i parë në listë është Randal Kolo Muani, për të cilin PSG është ulur nga 40 në 30 milionë euro. Megjithatë, pista që ka marrë forcë në orët e fundit është ajo e Alexander Sorloth. Juventusi e ka seriozisht për sulmuesin norvegjez, 1.96 m, i ndjekur edhe në janar nga shefi ekzekutiv Damien Comolli. Javën e kaluar një delegacion i Juventusit shkoi në Oslo për t’u takuar me përfaqësuesit e Sorloth; kontaktet u vlerësuan pozitive dhe paga prej 6 milionë euro bruto e sulmuesit të Atletico Madrid konsiderohet brenda parametrave të Zonjës së Vjetër. Sipas ‘La Gazzetta dello Sport’, rrugën për te Sorloth e hapi përfundimisht tekniku Luciano Spalletti, i cili dha miratimin pas një komunikimi telefonik me futbollistin.
I përshkruar nga Diego Simeone si një ‘vrasës me pagesë’ në zonën kundërshtare, Sorloth pati një sezon si figurant te Atletico Madrid, ku u radhit pas Julian Alvarez dhe Antoine Griezmann. Megjithatë ai regjistroi 54 ndeshje, 20 gola dhe 1 asist në total, shifra që vlerësohen si tregues i efikasitetit të tij dhe i aftësisë për të vendosur ndeshjet. Sorloth ka treguar edhe me kombëtaren se mund të bashkëjetojë me një tjetër qendërsulmues të nivelit të Erling Haaland. Pas interesit të Milani, Juventusi ka bërë lëvizjen vendimtare, ndihmuar edhe nga dëshira e vetë sulmuesit.
Atletico, që e bleu norvegjezin rreth dy vjet më parë për 30 milionë euro, e ka vendosur zyrtarisht në merkato dhe vlerëson kartonin e tij 25-30 milionë euro. Çelësi për zhbllokimin e marrëveshjes mund të jetë përfshirja e Nico Gonzales në tratativa: Atletico dëshiron ta mbajë Gonzales, por nuk synon të paguajë 32 milionë euro, ndaj kërkon ulje nga Juventusi — një shkëmbim që mund të jetë zgjidhje e përshtatshme për të dy klubet.
