Një 21-vjeçar u arrestua nga Policia e Sarandës si i dyshuar për përfshirje në atentatin me lëndë plasëse ndaj një shtetasi, ngjarje e ndodhur më datë 05.02.2026 në zonën e “Kryqëzimit i Urës së Vrinës” në Sarandë. Rasti hetohet si tentativë për vrasje, ndërsa hetimet po zhvillohen nën drejtimin e Prokurorisë së Sarandës.
Operacioni policor i koduar “Identifikimi”, i finalizuar nga specialistët e Sektorit për Hetimin e Krimeve të Rënda në bashkëpunim me shërbimet e Komisariatit të Policisë Sarandë, çoi në identifikimin, kapjen dhe ndalimin e të riut, i cili banon në fshatin Shëndëlli. Sipas prokurorisë, për të është nxjerrë urdhër ndalimi për veprat penale “Vrasja me paramendim”, mbetur në tentativë, e kryer në bashkëpunim, si dhe “Mbajtja pa leje dhe prodhimi i armëve, armëve shpërthyese dhe municionit”.
21-vjeçari dyshohet të ketë bashkëpunuar me dy persona të tjerë, të shpallur më parë në kërkim, identifikuar në materialet e hetimit si G. T. dhe Xh. B. Sipas hetimeve, këta dy shtetas më datë 05.02.2026 kanë vendosur eksploziv në automjetin që drejtonte shtetasi M. Gj. Policia njofton se hetimet e thelluara dhe intensive kanë qenë të fokusuar në identifikimin dhe nxjerrjen para përgjegjësisë penale të të gjithë të përfshirëve.
Gjatë kontrollit në banesën e të ndaluarit, forcat e rendit sekuestruan si provë materiale një armë zjarri pistoletë me municion luftarak, e cila mbahej pa leje. Materialet procedurale nga operacioni i koduar “Identifikimi” i janë referuar Prokurorisë së Sarandës për veprime të mëtejshme.
Vijojnë kontrollet dhe kërkimet për lokalizimin, kapjen dhe ndalimin e dy shtetasve të shpallur në kërkim, të përmendur në hetime si bashkëautorë të ngjarjes.
