Skuderia Ferrari zyrtarizoi rinovimin shumëvjeçar të kontratës me Charles Leclerc, që do të vazhdojë të garojë për ekipin edhe në sezonet e ardhshme të Botërorit të Formula 1. Në komunikatën zyrtare Ferrari thekson se Leclerc u bë pjesë e Akademisë së Pilotëve të Ferrarit në 2016 dhe se karriera e tij ka qenë e lidhur ngushtë me skuadrën: nga fitimi i titullit në Formula 2 në 2017, debutimi në Formula 1 e deri te bashkimi me Skuderinë në 2019. Që nga atëherë, Leclerc është shndërruar në një figurë qendrore të ekipit, të dalluar për shpejtësinë, talentin dhe shpirtin kompetitiv.
Ferrari vlerëson kontributin e tij me fitore, pole position dhe podiume, duke e përshkruar atë si një element gjithnjë e më të rëndësishëm në historinë e skuadrës. Në moshën 28-vjeçare, Leclerc rezulton piloti i dytë i Ferrarit me më shumë gara në Botërorin e Formula 1 dhe mban vendin e dytë në renditjen e pole position pas Michael Schumacher, sipas përshkrimit në komunikatë.
Vetë Leclerc shprehu kënaqësinë për rinovimin dhe vuri në dukje lidhjen e thellë me ekipin. Ai tha se vazhdimi i bashkëpunimit me Skuderinë është për të më shumë se një marrëdhënie profesionale; Ferrari ka qenë një ëndërr që fëmijë dhe, me kalimin e viteve, është bërë një familje e dytë. Leclerc përmendi momentet pozitive dhe të vështira të ndara me ekipin dhe shfaqi mirënjohje për mundësinë për të vazhduar të luftojë krah për krah me skuadrën për një objektiv të përbashkët: rikthimin e titullit botëror në Maranello.
Ai përshkroi detyrën e të qenit pilot i Ferrarit si një ëndërr dhe një përgjegjësi që nuk e merr asnjëherë të mirëqenë, duke premtuar se do të japë gjithçka për ta rikthyer skuadrën aty ku i takon, në majë, për stafin e Maranellos dhe për tifozët, të cilët sipas tij përbëjnë zemrën dhe pasionin e Skuderisë.
