Real Madridi po ndjek me seriozitet transferimin e mbrojtësit të krahut të Interit, Denzel Dumfries, i cili sipas mediave spanjolle dhe italiane është një nga objektivat kryesorë për sezonin e ardhshëm. Trajneri José Mourinho e ka identifikuar si pasuesin ideal të Dani Carvajal. Interesimi i klubit madrilen lidhet me klauzolën e largimit në kontratën e Dumfries me Interin: nga 1 deri më 31 korrik ai mund të transferohet kundrejt pagesës së një klauzole prej rreth 25 milionë eurosh, një shumë që konsiderohet e përballueshme nga drejtuesit e Realit.
Për Interin, një shitje e tillë do të përkthehej në një fitim të konsiderueshëm financiar. Dumfries u bashkua me zikaltërve në vitin 2021 për rreth 12 milionë euro, ndërsa vlera kontabël e tij aktualisht është shumë më e ulët, çka do të sigurojë për klubin italian një plusvalencë prej rreth 20 milionë eurosh. Në pritje të një largimi të mundshëm, drejtuesit e Interit kanë nisur të mendojnë për pasuesin: Marco Palestra konsiderohet kandidati kryesor për të forcuar krahun e djathtë në rast se Dumfries largohet.
Sipas raportimeve nga Spanja, Real Madridi nuk dëshiron të presë deri në përfundimin e Kupës së Botës për të mbyllur operacionin. Nëse klubi madrilen synon ta finalizojë transferimin më herët, do të duhet të negociojë drejtpërdrejt me Interin. Nga ana tjetër, vetë Dumfries shihet i prirur të pranojë ofertën e Realit, ndërsa në ambientin zikaltër vlerësohet se shifra e klauzolës përputhet me vlerën reale të lojtarit në treg.
Për momentin, në Madrid vëmendja mbetet te zgjedhjet presidenciale të klubit, por pas tyre priten zhvillime të rëndësishme në merkato; Dumfries po konsiderohet si një nga emrat më të nxehtë të verës dhe lëvizjet rreth tij priten të përcaktojnë edhe planet e Interit për sezonin e ardhshëm.
