Maran thekson se koha me Kombëtaren është e kufizuar dhe se ditët për të punuar me lojtarët janë të pakta, por beson se ato kanë mjaftuar për të krijuar një ide se si duhet të luajë skuadra. Përveç njohjes së lojtarëve, periudha ka shërbyer për të identifikuar dhe përmirësuar gabimet. Ai nënvizon domosdoshmërinë e qasjes së duhur për ndeshjen e ardhshme dhe vlerëson se, sipas asaj që ka parë, skuadra është në pikën e duhur.
Maran vë në dukje rëndësinë e rezultatit dhe të performancës, duke thënë se të dyja gjërat janë të rëndësishme edhe pse bëhet fjalë për ndeshje miqësore. Ai përmend pritshmëritë e tifozëve për fitore dhe shpreson që skuadra të dalë në fushë me synim marrjen e rezultatit. Pranon se do të jetë e vështirë, por një rezultat i mirë do të ishte i përshtatshëm.
Në lidhje me stilin lojës, ai nënvizon se bëhet fjalë për Shqipërinë, jo për ndeshjen PSG-Arsenal, dhe për këtë arsye duhet të ndërtohet një ADN e skuadrës që buron nga karakteristikat e vetë lojtarëve. Maran paralajmëron se një trajner që nuk lëviz nga ideja e tij nuk mund të evoluojë, pasi edhe futbolli dhe lojtarët kanë ndryshuar. Qëllimi i tij është që skuadra të mbyllë ndeshjet dhe të sigurojë një rezultat pozitiv.
Ai përsërit dëshirën për një skuadër agresive, që hyn në fushë për të fituar, dhe shprehet se ndeshja me Izraelin do të jetë e vështirë dhe një test provues. Nga lojtarët kërkon kurajë dhe personalitet.
Maran thotë se ka provuar disa gjëra gjatë përgatitjeve, edhe pse koha ishte e kufizuar, dhe se është bazuar te karakteristikat dhe cilësitë e lojtarëve. Shtohet se ka edhe një stërvitje përpara ndeshjes dhe pas saj do të sqarohen gjërat.
