Kryetari i Kuvendit të Shqipërisë, Niko Peleshi, zhvilloi një vizitë zyrtare në Estoni, e para e turit të diplomacisë parlamentare në vendet baltike, ku u takua me Presidentin Alar Karis dhe me Kryetarin e Parlamentit estonez, Lauri Hussar. Në të dy takimet u konfirmuan marrëdhëniet e shkëlqyera ndërmjet Shqipërisë dhe Estonisë, të mbështetura në vlera të përbashkëta demokratike, orientimin euroatlantik dhe angazhimin për paqen, sigurinë dhe unitetin europian. U theksua forcimi i bashkëpunimit brenda kornizave të Bashkimit Europian, NATO-s dhe organizatave shumëpalëshe.
Peleshi vlerësoi mbështetjen e vazhdueshme të Estonisë për integrimin europian të Shqipërisë dhe nënvizoi se Shqipëria po avancon me ritmin më të shpejtë sipas metodologjisë së re të zgjerimit, duke hapur të gjitha grup-kapitujt e negociatave brenda 13 muajsh për shkak të reformave në drejtësi, administratë publike, qeverisje demokratike, ekonomi dhe mbrojtjen e të drejtave themelore. Ai përcaktoi objektivin kombëtar për mbylljen e kapitujve më pak kompleks gjatë vitit 2026, përfundimin e negociatave në 2027 dhe anëtarësimin e plotë në BE deri në 2030. Karis riafirmoi mbështetjen e vendosur të Estonisë për Shqipërinë dhe vendet e Ballkanit Perëndimor, duke e konsideruar zgjerimin e BE-së një investim strategjik për stabilitetin dhe sigurinë e Europës.
Një vend të rëndësishëm zuri transformimi digjital dhe siguria kibernetike, ku Peleshi vlerësoi përvojën e Estonisë si model për harmonizimin e qeverisjes së mirë me efikasitetin dhe integritetin e shërbimeve publike, dhe shprehu interes për zgjerimin e bashkëpunimit në këto fusha. Me Hussar u diskutua forcimi i bashkëpunimit ndërparlamentar, rritja e shkëmbimeve mes komisioneve, administratave të kuvendeve dhe grupeve të miqësisë, si dhe rëndësia e diplomacisë parlamentare për afrimin e dy vendeve dhe mbështetjen e proceseve reformuese.
Palët diskutuan zhvillimet e sigurisë në Europë, mbështetjen për Ukrainën dhe riafirmuan qëndrimin për mbrojtjen e sovranitetit dhe integritetit territorial të saj. Peleshi njoftoi se Shqipëria do të bashkëorganizojë në qershor, së bashku me Ministrinë e Jashtme të Ukrainës, Takimin Ministror “Ukraina – Europa Juglindore”. U riafirmua vizioni për kohezionin e NATO-s, respektimin e së drejtës ndërkombëtare dhe rëndësia strategjike e Ballkanit Perëndimor; u vlerësua edhe kontributi i Shqipërisë në NATO dhe praninë e forcave shqiptare në rajonin baltik. Diskutimet përfshinë gjithashtu zgjerimin e bashkëpunimit në arsim, shkencë, kulturë, turizëm dhe diplomaci të butë. Peleshi u takua gjithashtu me Kryetarin e Komisionit për Çështjet e BE-së, Peeter Tali, ku bisedimet u përqendruan te procesi i anëtarësimit të Shqipërisë dhe perspektiva e zgjerimit të BE-së drejt Ballkanit Perëndimor. Kryetari i Kuvendit ishte shoqëruar nga deputetët Ilirjan Pendavinji, Onid Bejleri, Besart Xhaferi dhe Klodiana Capja.
