Tensione të forta po raportohen në plazhin e Borshit, ku emri i Ilir Dokës po përmendet në qendër të një skandali që lidhet me tentativën për të marrë nën kontroll një nga subjektet më të njohura të zonës, “Road House Beach Bar”.
Sipas denoncimeve publike, Doka, përmes hotelit “Sole Luna”, po kërkon të përfitojë një hapësirë plazhi që aktualisht administrohet nga një tjetër subjekt, ndërsa Agjencia Kombëtare e Bregdetit akuzohet se ka hapur rrugën për këtë operacion përmes një kualifikimi të diskutueshëm, të mbështetur, sipas palës denoncuese, mbi dokumentacion dhe kontrata që konsiderohen fiktive.
Akuza bëhet edhe më e rëndë për faktin se “Sole Luna” disponon tashmë plazhin e vet privat, por pavarësisht kësaj pretendohet se po synon të zgjerojë kontrollin mbi zona të tjera bregdetare. Sipas denoncimit, përmes pretendimeve mbi kapacitetet akomoduese, po tentohet të justifikohet përfitimi i hapësirave të reja plazhi, përfshirë edhe atë të “Road House Beach Bar”, që disponon rreth 70 çadra.
Denoncuesit ngrenë pikëpyetje serioze mbi mënyrën se si një subjekt me kapacitete të kufizuara akomoduese mund të synojë të marrë nën kontroll disa hapësira plazhi njëkohësisht, duke e cilësuar situatën si një rast flagrant favorizimi dhe shkeljeje të kritereve ligjore.
Ndërkohë, pronari i “Road House Beach Bar”, i cili pretendon se disponon dokumentacion të rregullt noterial për aktivitetin e tij në Borsh, rezulton të jetë refuzuar nga institucionet, duke shtuar edhe më shumë dyshimet mbi procesin.
Kjo nuk është hera e parë që emri i Ilir Dokës lidhet me tensionet në zonë. Vetëm një muaj më parë, konflikti mes palëve degradoi në përplasje fizike dhe verbale, duke çuar gjashtë persona në komisariat. Më pas, administratori i “Road House” kallëzoi në polici një tjetër tentativë për zaptimin e hapësirës së plazhit.
Por sipas denoncimit, pavarësisht ndërhyrjeve të policisë, skenari është përsëritur edhe sot. Persona të lidhur me palën kundërshtare kanë nisur sërish vendosjen e çadrave në zonën e kontestuar, duke rritur frikën e banorëve dhe bizneseve se situata mund të dalë jashtë kontrollit.
Nëse këto pretendime rezultojnë të vërteta, atëherë kemi të bëjmë jo vetëm me një konflikt për plazhin, por me një rast ku interesat private po sfidojnë hapur të drejtat e pronësisë dhe rregullat e menaxhimit të bregdetit shqiptar. Tashmë sytë janë drejt institucioneve: a do të hetohen akuzat ndaj Ilir Dokës dhe procesi i ndjekur nga Agjencia Kombëtare e Bregdetit, apo Borshi do të mbetet peng i një lufte për metrat e artë të bregdetit?
