Rama iu drejtua protestuesve duke kërkuar që të sjellin projektin që duan të anulohet, ndërsa deklaroi se aktualisht nuk ekziston një projekt për t’u anuluar. Ai tha se, nëse ia sjellin projektin, do ta anulojnë, por pohoj se nuk ka çfarë të paraqesin sepse projekti po punohet nga pesë studio ndërkombëtare të njohura: Kengo Kuma (Japoni), Bjarke Ingels (Danimarkë), Jean Nouvel (Francë), Emre Arolat (Turqi) dhe K-Studio (Greqi). Sipas tij, projekti do të prezantohet publikisht sapo të jetë gati, siç veprohet me çdo investim të madh të arkitektëve ndërkombëtarë.
Ai kundërshtoi tezën se “Izraeli ka marrë Zvërnecin për ta bërë geto palestineze” dhe akuzoi protestuesit se po keqpërdorin ndjenjat e qytetarëve të mirë, pavarësisht feve e bindjeve, për t’u mobilizuar kundër një investimi që, sipas Ramës, do të shkatërronte natyrën — një pretendim që ai e cilësoi si manipulim. Rama theksoi se qytetarët dalin në rrugë të prekur nga manipulimet dhe jo për të fyer kujtimin e gjyshërve që, sipas tij, mbrojtën hebrenjtë gjatë Luftës së Dytë Botërore.
Ai prezantoi bashkëinvestitorët e projektit të madh turistik në Zvërnec si “miq të çmuar amerikanë” dhe partnerë nga Katari, të cilët ai i përshkroi si bashkëpronarë të konglomeratit Poëer Holding dhe si “muslimanë vizionarë e të përulur ndaj Allahut e ndaj punës”. Rama i bëri thirrje publikut të vizitojë http://poëerholding.com për të parë informacionin rreth investimit, të cilin e përmendi si një projekt me vlerë 4 miliardë euro që do të realizohet nga kompania “Assets”, pjesë e Poëer Holding.
Ai akuzoi kundërshtarët se i kanë platformat e tyre të orkestruara, paguar dhe trajnuar për të zbatuar një plan që sipas tij synon të shndërrojë Shqipërinë në “tokë të djegur” për investime të mëdha, dhe u adresua ndaj atyre që, siç tha, po përdorin gënjeshtra dhe shpifje për të nxitur një luftë të stisur. Rama paralajmëroi se e vërteta do të dalë në shesh dhe se gënjeshtrat e kundërshtarëve kanë filluar të bëjnë dëm vetë atyre.
