Ish-administratori Valon Lluka ka publikuar një reagim zyrtar lidhur me ngërçin në procesin e shitblerjes së aksioneve të Aeroportit Ndërkombëtar të Vlorës, duke përmendur dhe denoncuar biznesmenin Behgjet Pacolli. Lluka thotë se për muaj ka qëndruar i heshtur, duke pritur reagimin e drejtësisë dhe institucioneve, por vendosi të flasë kur u mohuan dokumente, vendime dhe autorizime që mbajnë firmat e Behgjet dhe Emin Pacollit, dhe kur janë hedhur akuza ndaj personave që sipas tij kanë zbatuar vetëm mandatet e marra.
Ai thotë se ka dokumente që ttyohojnë procesin institucional të shitjes së aksioneve. Sipas tij, në maj 2022 Mabco Construction SA miratoi zyrtarisht shitjen e aksioneve të VIA-s dhe e autorizoi atë për realizimin e procesit; vendimi dhe autorizimi u nënshkruan, u noterizuan dhe u apostiluan në Zvicër. Në korrik 2023 u mor vendim për 47% të aksioneve dhe në të njëjtën ditë iu lëshua një prokurë e posaçme që e autorizonte të nënshkruante dokumentet dhe të kryente regjistrimet ligjore përkatëse.
Lluka thekson se një kontratë shitblerjeje nuk mund të nënshkruhet pa vendim të aksionarëve dhe autorizim formal nga kompania, dhe se vendimet e autorizimet i janë përcjellë që nga viti 2022 drejtpërdrejt nga administrata e Mabco në Lugano përmes komunikimeve zyrtare. Ai pohon se ka pasur komunikim të drejtpërdrejtë dhe ka kërkuar konfirmime para veprimeve, duke vepruar vetëm pas marrjes së tyre, dhe se procesi nuk është zhvilluar në mënyrë individuale apo të fshehtë.
Dokumentet, sipas tij, janë përgatitur dhe ndjekur ndër vite nga administrata, juristë, staf i përfshirë në komunikime zyrtare, emaila dhe procedura institucionale, me noterizime dhe apostilime. Ai ngre pyetjen retorike nëse pretendimet që gjithë procesi ka qenë një “skemë personale” do të nënkuptonin përfshirjen e administratës, juristëve, menaxhmentit dhe bashkëpunëtorëve të ngushtë pa dijeninë e tyre.
Lluka deklaron se nuk ka nënshkruar asnjë dokument pa autorizim, nuk ka vepruar jashtë mandatit dhe ka vepruar sipas dokumenteve. Për transparencë ai thotë se publikon një pjesë të dokumenteve dhe komunikimeve zyrtare që, sipas tij, dëshmojnë natyrën institucionale të procesit dhe autoritetet përkatëse.
