Sipas modelit më të fundit matematikor të zhvilluar nga Goldman Sachs, favorite për të fituar Kupën e Botës 2026 është Spanja, me 26% probabilitet për të ngritur trofeun. Ndryshe nga parashikimet e kompanive të basteve, analiza bazohet në një simulim kompleks statistikor që përfshin rreth 20 mijë ndeshje ndërkombëtare jo-miqësore të zhvilluara që nga viti 1978. Modeli përdor një sistem të ngjashëm me vlerësimin Elo, duke marrë në konsideratë jo vetëm rezultatet historike, por edhe faktorë si forma aktuale e skuadrës, cilësia e sulmit, prania e golashënuesve kryesorë dhe avantazhi i fushës.
Pas Spanjës, renditja e favoritëve sipas modelit vazhdon me Francën (19%), Argjentinën (14%), Brazilin (8%) dhe Anglinë (5%). Spanjën e favorizon vlerësimi i saj i lartë Elo, efikasiteti në sulm dhe seria e rezultateve pozitive. Argjentina penalizohet nga fenomeni i njohur si “rënia e kampionit”, një tendencë statistikore që shpesh prek skuadrat që mbrojnë titullin. Franca ndikohet nga mundësia e përballjes me Spanjën që në gjysmëfinale, ndërsa Anglia vuan nga një short i vështirë dhe precedentët negativë në turnetë madhorë.
Simulimi parashikon edhe disa duele të rëndësishme gjatë turneut: në fazën e 1/16-ave mund të zhvillohet përballja mes SHBA-së dhe Iranit, ndërsa në çerekfinale pritet përballja mes Argjentinës dhe Portugalisë. Gazeta raportonte se një takim i tillë do të mund të sillte për herë të fundit përballjen e dy legjendave Lionel Messi dhe Cristiano Ronaldo.
Sipas parashikimit të modelit, finalja e Botërorit 2026 do të luhet mes Argjentinës dhe Spanjës, me iberikët që do të triumfonin dhe do ta rikthenin trofeun në Evropë pas suksesit të fundit të një kombëtareje nga Amerika e Jugut. Goldman Sachs vlerëson gjithashtu se 13 kombëtare kanë 0% shanse për të fituar turneun.
