Shqipëria do të përfitojë nga eksperienca izraelite për zhvillimin e bujqësisë, pas nënshkrimit të Memorandumit të Mirëkuptimit midis palës shqiptare dhe asaj izraelite. Ambasadorja e Izraelit, Galit Peleg, nënvizoi se vendi ka potencial të jashtëzakonshëm falë produkteve organike me cilësi të lartë dhe një fuqie punëtore të përkushtuar, por për zhvillim të mëtejshëm ky sektor ka nevojë për partneritete tregtare që sjellin rritje ekonomike dhe qëndrueshmëri. Ajo theksoi gjithashtu se bujqësia mbart rëndësi më të gjerë sesa vetëm aspekti ekonomik, sidomos në kushtet e sfidave globale si ndryshimet klimatike, pasiguria gjeopolitike dhe ndërprerjet në zinxhirët e furnizimit.
Zëvendësministri i Bujqësisë, Fatmir Guri, bëri të ditur se fermerët shqiptarë duhet të marrin njohuri mbi mënyrat e prodhimit sipas standardeve që kërkon Bashkimi Evropian. Guri theksoi se modeli izraelit është shembull i qartë i bujqësisë moderne, ku fokusi është në përdorimin efikas dhe të mençur të burimeve dhe jo thjesht në bollëk. Sipas tij, është thelbësore që prodhimet të jenë të sigurta dhe të standardizuara, çka ka rëndësi të veçantë për procesin e integrimit të Shqipërisë drejt BE-së.
Përfaqësuesi i Ministrisë së Bujqësisë së Izraelit, Oren Lavi, vuri theksin te roli i teknologjisë dhe kërkimit në ballafaqimin me ndryshimet klimatike dhe sfidat e ardhshme të ushqyerjes globale. Ai përmendi nevojën për zgjidhje teknologjike, duke theksuar se fermerët e së ardhmes do të përdorin edhe Inteligjencën Artificiale si pjesë të praktikave bujqësore. Lavi tha se teknologjia dhe kërkimi janë premtimi më i madh i Izraelit dhe se bota ka nevojë për to tani.
Në ngjarjen ku u nënshkrua memorandumi morën pjesë 12 kompani izraelite të specializuara në teknologji bujqësore dhe siguri ushqimore, të cilat do të shkëmbejnë përvojën dhe ekspertizën e tyre me kompani shqiptare. Nëpërmjet këtij bashkëpunimi synohet rritja e kapaciteteve teknologjike, sigurimi i standardeve dhe përshpejtimi i integrimit të produkteve shqiptare në tregje më të mëdha. Burim: Top Channel.