Kryeministri Edi Rama mbajti një fjalim të gjatë lidhur me zhvillimet rreth projektit të Zvërnecit dhe protestave kundërshtuese, ku theksoi se përplasja për këtë projekt po shoqërohet me propagandë nga mediat greke. Rama përshkroi investitorët si “partnerë të jashtëzakonshëm” që kanë ardhur për të investuar 4 miliardë euro, duke i dalluar nga ndërtuesit që, sipas tij, ndërtojnë, shesin e largohen, duke lënë probleme me pronësinë e banesave. Ai përsëriti se investimi bëhet nga pronarë të terrenit, të cilët e kanë blerë me para që, sipas tij, janë të mbikëqyrura në mënyrë strikte nga Agjencia Kundër Pastrimit të Parave dhe partnerët ndërkombëtarë që bashkëpunojnë me atë agjenci.
Rama sqaroi se pagesat janë bërë një nga një, me bankë, dhe jo nga Izraeli — duke shtuar se paratë vijnë nga Katari. Në fjalën e tij ai komentoi edhe kundërshtimet etnike e fetare, duke e shprehur në mënyrë kritike përkatësinë fetare të disa aktorëve mediatikë apo politikanëve që, sipas tij, “i thonë vetes myslimanë” por nuk respektojnë parimet e Kuranit, duke i akuzuar për shpifje që “helmojnë njerëzit”.
Duke iu drejtuar protestuesve dhe kritikëve, Rama vuri në dyshim rolin e gazetave greke që, sipas tij, janë mobilizuar për të mbështetur kauzën e tyre, dhe pyeti se si mund të jenë “gazetat e Greqisë aleatë” të mbrojtjes së mjedisit të Shqipërisë. Ai sugjeroi se linja mediatike e huaj po ndihmon në ndërtimin e një imagjine ku është gjetur “tradhtari”, “shitësi i atdheut” dhe “i korruptuari” — shënoj që, sipas tij, është portreti që i atribuohet kryeministrit.
Materiali i plotë i fjalimit u transmetua nga Top Channel.
