Projekti i Zvërnecit ishte temë qendrore në konferencën e kryeministrit Rama, i cili theksoi se natyra do të ruhet dhe se aktualisht nuk ekziston asnjë projekt të miratuar, pas refuzimit të projektit të parë. Rama sqaroi se zona e quajtur Pish Poroja nuk është e kategorizuar si zonë e mbrojtur e kategorisë së parë apo të dytë, por është klasifikuar si kategori e pestë, “Peizazh i mbrojtur”, sipas një vendimi qeverie dhe përkufizimeve në ligj. Ai shpjegoi se sa më lart të jetë kategoria e mbrojtjes, aq më shumë kufizohet ndërhyrja njerëzore, ndërsa kategoria e pestë parashikon një nivel bashkëjetese që lejon zhvillim dhe turizëm, duke vënë si shembull laguna të ngjashme në Europë që funksionojnë si destinacione ekonomike dhe sociale.
Rama përmendi nenin 20 të ligjit, sipas të cilit territori i kategorisë së pestë mund të ketë praninë e njerëzve dhe zhvillimet lejohen vetëm pas marrjes së lejes së zhvillimit. Ai theksoi se Pish Poroja ka qenë dhe mbetet peizazh i mbrojtur dhe se në vitin 2024 u bë një amendim i ligjit, pas kërkesave të kryebashkiakëve dhe deputetëve, për të gjetur një ekuilibër midis zhvillimit dhe mbrojtjes.
Duke folur për raste të tjera, Rama përmendi se Thethi është zonë e mbrojtur dhe se legalizimet pas diktaturës u kryen për shkak të realitetit të ditur, pavarësisht ndërtimeve pa leje; ai sqaroi se kjo nuk përfshin ata që kanë ndërtuar së fundmi. Për Vlorën, ai tha se nuk ndërtohet në Vjosë dhe se zona e mbrojtur nuk lejon ndërtimin e resorteve atje.
Sa i përket ecurisë së projektit, investitorët pas prezantimit në 2023 nisën negociatat për Sazanin dhe më pas për Zvërnecin. Projekti i parë nuk u pranua; më 10 shtator 2024 ata kërkuan lejen e parë, por më vonë projekti u rrëzua duke kërkuar reduktim të intensitetit të ndërtimit dhe ruajtjen e lagunës. Kryeministri konfirmoi se në vitin 2024 nuk u miratua ndonjë projekt dhe se sot nuk ekziston asnjë projekt arkitektonik i miratuar; pas refuzimit, investitorët kanë angazhuar pesë studio të nivelit ndërkombëtar. Burimi: Top Channel.
