Policia e Shtetit njoftoi se, pas incidenteve gjatë tubimit të qytetarëve kundër projektit në Zvërnec më 30.05.2026 në Portonovë, iu hoq licenca për ushtrimin e aktivitetit dy kompanive të sigurisë fizike: ShPSF “Myrto Security 1.3A” dhe ShPSF “Major Security”. Vendimi u bazua në konstatat e hetimeve administrative të kryera nga Drejtoria e Standardeve Profesionale dhe Departamenti për Sigurinë Publike në Drejtorinë e Përgjithshme të Policisë së Shtetit, me synim nxjerrjen e përgjegjësive për veprimet dhe mosveprimet gjatë tubimit, si dhe për vlerësimin e ligjshmërisë së subjekteve private të kontraktuara për ruajtjen e pronës.
Sipas raportit të policisë, ShPSF “Myrto Security 1.3A” nuk kishte zbatuar rregullat për regjimin e hyrjes dhe daljes së personave dhe mjeteve në objekt, nuk administronte listën e personave dhe mjeteve të lejuara të hynin në brendësi të rrethimit, dhe nuk kishte marrë masat e nevojshme për sigurinë e objektit. Si pasojë, në zonë u lejua hyrja e personave të paidentifikuar, të cilët gjatë tubimit ndërhynë pa asnjë atribut ligjor, goditën dhe tërhiqën me forcë një pjesëmarrës, duke i shkaktuar lëndime trupore, dhe reaguan ndaj protestuesve me gurë dhe sende të tjera nga rrethimi. Punonjësit e “Myrto Security” nuk kryen veprime parandaluese për largimin e personave që ushtruan dhunë.
Në rastin e ShPSF “Major Security”, një punonjës i licencuar u arrestua pasi goditi me grusht një protestues. Dy persona të tjerë janë proceduar penalisht për tërheqjen me forcë të një qytetari që ra pa ndjenja; verifikimet treguan se këta të proceduar nuk figuronin të regjistruar apo të licencuar nga subjekti për të ushtruar detyrën. Sipas policisë, punonjësi i licencuar së bashku me dy të tjerë kryen veprime arbitrare, shpërdoruan detyrën dhe tejkaluan kompetencat duke shkaktuar dëmtime trupore.
Si përfundim të hetimeve administrative dhe duke u referuar ligjit “Për shërbimin privat të sigurisë fizike”, Drejtori i Përgjithshëm i Policisë së Shtetit vendosi heqjen e licencave për të dy subjektet. Hetimet penale dhe administrative vijojnë.
