Barcelona ka konfirmuar se i ka dërguar zyrtarisht Atletico Madridit një ofertë prej 100 milionë eurosh për sulmuesin argjentinas Julian Alvarez. Sipas raportimeve të Mundo Deportivo, të mbështetura nga burime brenda klubit katalanas, oferta i është dorëzuar klubit madrilen përmes drejtorit sportiv Mateu Alemany dhe trajtohet si një operacion normal merkatoje.
Atletico Madrid nga ana e tij ka mohuar ekzistencën e një oferte të tillë, duke e cilësuar raportimin si një “gënjeshtër”. Barcelona këmbëngul se propozimi është real dhe pret një përgjigje zyrtare nga klubi madrilen. Tensionet mes dy klubeve janë rritur në ditët e fundit, por drejtuesit e Barcelonës synojnë të shmangin polemikat publike dhe mbajnë komunikim të matur rreth rastit. Burime pranë Barcelonës bëjnë me dije se fokusi kryesor i klubit është dëshira e vetë lojtarit për t’u transferuar në “Camp Nou”.
Sipas raportit, Julian Alvarez i ka komunikuar Atletico Madridit, përmes agjentit të tij Fernando Hidalgo, se dëshiron të largohet këtë verë për t’iu bashkuar projektit sportiv të Barcelonës. Agjenti Hidalgo është takuar javën e kaluar me përfaqësues të klubit katalanas për të diskutuar mundësinë e transferimit, sipas të njëjtave burime.
Megjithatë, Atletico mban një pozicion të fortë në këtë situatë: lojtari ka kontratë me klubin madrilen deri në vitin 2030 dhe, sipas raporteve, një klauzolë largimi prej 500 milionë eurosh. Këto rrethana e vendosin klubin në një pozicion të privilegjuar nëse vendos të mbajë lojtarin ose të kërkojë një çmim shumë të lartë për largimin e tij.
Deri më tani, as presidenti i Barcelonës Joan Laporta, as drejtori sportiv Deco dhe as trajneri Hansi Flick nuk kanë bërë deklarata publike për çështjen Alvarez. Mbetet për t’u parë nëse Atletico do të hapë negociata zyrtare për një nga lojtarët e saj kryesorë dhe si do të reagojë ndaj kërkesës së Barcelona-s.
