Ibrahima Konate ka vendosur të mos e rinovojë kontratën me Liverpool, e cila skadon më 30 qershor, dhe do të kërkojë një sfidë të re në karrierë. Mbrojtësi francez, 27 vjeç, është kërkuar nga klube evropiane të mëdha, përfshirë Bayernin e Mynihut dhe Chelsean. Lajmin e bëri zyrtar duke përshëndetur klubin përmes një letre të gjatë dhe një videoje të publikuara në rrjetet sociale.
Në letrën e tij Konate rikujtoi se erdhi te Liverpooli pesë vjet më parë si një futbollist i ri me ëndrra të mëdha dhe se largohet me kujtime që do ta shoqërojnë për pjesën e mbetur të jetës së tij. Ai e përshkroi si nder përfaqësimin e kësaj skuadre dhe u ndal te momentet e ndara me klubin: uljet dhe ngritjet, trofetë, sfidat dhe miqësitë që, sipas tij, do të zgjasin përgjithmonë. Konate përmendi edhe periudha të vështira, duke veçuar humbjen e “vëllait tonë Diogo” dhe vdekjen e babait të tij këtë vit, ngjarje që e konsideroi ndër më të vështirat në jetën e tij. Megjithatë, ai theksoi se në këto momente impenjimi i tij ndaj klubit nuk ndryshoi dhe se dha gjithçka për stemen në momentet më të ashpra.
Konate shprehu falënderime për shokët e skuadrës, trajnerët, stafin dhe të gjithë ata që punojnë pas skenave për ndihmën në rritjen e tij si lojtar. Ai u drejtua edhe te tifozët, të cilëve u dha falënderime për dashurinë, energjinë dhe mbështetjen e jashtëzakonshme që i kanë dhënë gjatë periudhës te Liverpool.
Në letër ai shprehu keqardhje që nuk pati mundësinë t’u thoshte lamtumirë të gjithëve në ndeshjen e fundit, duke pranuar se nuk e dinte se do të ishte hera e fundit që do të vishte fanelën e klubit para tifozëve. Konate përfundoi duke thënë se kjo nuk është një lamtumirë e lehtë, por se ka ardhur koha për një kapitull dhe sfidë të re, dhe shprehu shpresën për t’u takuar përsëri me klubin dhe tifozët. Publikimi i letrës shoqërohej edhe me një video prekëse në rrjetet sociale. Top Channel transmetoi lajmin.
