Negociatat mes SHBA-së dhe Iranit për një memorandum mirëkuptimi janë futur në një fazë të ndërlikuar, pasi mungesa e miratimit përfundimtar nga Teherani ka shkaktuar vonesa dhe tensione diplomatike. Drafti i marrëveshjes thuhet se është dakordësuar në parim nga negociatorët kryesorë të të dy palëve, por miratimi final nga udhëheqja iraniane, përkatësisht Mojtaba Khamenei, ende nuk është dhënë. Kjo vonesë ka shtyrë procesin dhe ka irrituar presidentin amerikan, Donald Trump, i cili ka kërkuar ndryshime të reja në draft.
Sipas raportimeve, Trump ka urdhëruar shtrëngimin e kushteve të marrëveshjes, duke theksuar se Irani nuk duhet të pajiset kurrë me armë bërthamore dhe se rezervat e tij të uraniumit të pasuruar duhet të neutralizohen ose shkatërrohen nën mbikëqyrje ndërkombëtare. Po ashtu është paralajmëruar se heqja e sanksioneve nuk do të ndodhë deri në njoftim të mëtejshëm.
Elementet kryesore të draftit përfshijnë ndalimin e armiqësive, një periudhë 60-ditore negociatash për një marrëveshje përfundimtare dhe lehtësime të mundshme ekonomike për Iranin, si lirimi i aseteve të ngrira dhe heqja graduale e sanksioneve. Në dokument parashikohen gjithashtu rifillimi i lundrimit në Ngushticën e Hormuzit dhe krijimi i një fondi ndërkombëtar për rindërtim pas konflikteve.
Në anën iraniane, vonesa e vendimmarrjes lidhet me mungesën e konfirmimit të plotë nga udhëheqja politike dhe fetare, e cila sipas raportimeve po komunikon në mënyrë indirekte përmes ndërmjetësve. Kjo mënyrë e komunikimit dhe mungesa e miratimit të qartë kanë shtuar pasigurinë mbi fatin e marrëveshjes dhe kanë ngadalësuar përparimin.
Ekspertët paralajmërojnë se zvarritja e procesit rrit rrezikun e keqkuptimeve diplomatike dhe mund të çojë në përshkallëzim të ri të tensioneve në Lindjen e Mesme, veçanërisht në zona të ndjeshme si Libani dhe Ngushtica e Hormuzit, ku përplasjet gjeopolitike mbeten të forta. Top Channel.
