Kryeministri Edi Rama, në rubrikën “Shënimet e Javës” të podkastit “Flasim”, komentoi hapjen e fazës së mbylljes së negociatave për anëtarësim në Bashkimin Europian. Ai theksoi se më 26 maj, saktësisht 30 vjet pas një 26 maji të dhunshëm që shënoi grabitje votash dhe nisjen e një sundimi me prirje autokratike, Shqipëria hyri në fazën përfundimtare të rrugëtimit të saj europian, duke përfunduar fazën e çeljes së kapitujve dhe duke hapur fazën e mbylljes së tyre.
Rama përshkroi këtë moment si një kulm historik në një ngjitje të gjatë dhe të mundimshme, dhe shprehu besimin se vendi po afrohet më shumë se kurrë me ëndrrën e anëtarësimit në BE, duke përdorur metaforën e vendosjes së flamurit kuqezi të Ismail Qemalit dhe Gjergj Kastriotit në majën e këtij procesi. Ai e vlerësoi si një moment jashtëzakonisht kuptimplotë dhe si një certifikim të punës së palodhur dhe transformimeve të thella të bëra gjatë dekadës së fundit.
Kryeministri nënvizoi se ky sukses nuk është vetëm një datë në kalendarin e integrimit, por pasqyrë e reformave shumë të vështira dhe të sfiduara, si dhe e forcimit të institucioneve. Megjithatë, sipas tij, kjo sjell edhe peshën e përgjegjësisë për të konsoliduar shtetin ligjor, hapësirën e lirive individuale dhe barazinë para ligjit.
Ai theksoi se Bashkimi Europian ka konfirmuar përmbushjen e detyrave kryesore në fushat e drejtësisë, luftës kundër korrupsionit dhe funksionimit të institucioneve demokratike. Ky verifikim është, sipas Ramës, një arsye për krenari, por edhe për vetëdijesim mbi vështirësitë e fazës finale të negociatave, që e përshkroi si më të vështirën.
Rama sqaroi se ekziston një kalendar i dakordësuar me Komisionin Europian për të synuar mbylljen e negociatave deri në fund të vitit 2027, me një periudhë ndërmjetëse në vitin 2028, dhe objektivin madhor të anëtarësimit të Shqipërisë në Bashkimin Europian brenda vitit 2030.
