Komuniteti Mysliman i Shqipërisë reagoi pas qarkullimit të udhëzimit të Ministrisë së Shëndetësisë mbi terapi hormonale për të miturit në QSUT, duke shprehur shqetësim të thellë për debatin publik që pasoi. Udhëzimi, që parashikon nisjen e terapisë nga mosha 16 vjeç e, në raste të veçanta, edhe nga 14 vjeç, sipas KMSH-së prek çështje jashtëzakonisht delikate që ndikojnë në zhvillimin fizik, emocional dhe psikologjik të fëmijëve dhe adoleshentëve.
Komuniteti rikujton kundërshtimin e tij të mëparshëm ndaj ligjit për barazinë gjinore dhe thekson se qëndrimi i tij mbetet koherent kundër çdo derivati që, siç e quan, hap rrugë për ndërhyrje hormonale në moshë të miturish. Sipas reagimit, çdo hap institucional në këtë drejtim duhet të trajtohet me kujdes maksimal, përgjegjësi të lartë dhe ndjeshmëri ndaj vlerave të shoqërisë shqiptare.
KMSH shpreh kundërshtimin e tij ndaj çdo qasjeje që mund të lehtësojë ndërhyrje hormonale në moshat e përmendura, duke argumentuar se të miturit nuk duhet të vendosen përballë procesesh me pasoja të thella dhe afatgjata ndërsa personaliteti dhe identiteti i tyre janë ende në formim. Organizata thekson se fëmijët kanë nevojë për mbrojtje, orientim, mbështetje familjare dhe kujdes profesional të përgjegjshëm.
Reagimi vë në dukje se shoqëria nuk duhet të normalizojë praktika që, sipas Komunitetit, krijojnë paqartësi dhe tension social në raport me natyrën njerëzore, familjen dhe edukimin e brezave të rinj. Komuniteti i bën thirrje institucioneve shtetërore, profesioneve të shëndetit, prindërve dhe aktorëve shoqërorë që çështjet e tilla të trajtohen me maturi, dialog të gjerë dhe përgjegjësi kombëtare, jo me nxitim apo nën ndikimin e trendeve ideologjike të përkohshme.
Në përfundim, KMSH shpreh solidaritet me shqetësimet e prindërve dhe besimtarëve që kërkojnë ruajtjen e vlerave familjare, mbrojtjen e fëmijëve dhe respektimin e ndjeshmërisë morale e kulturore të shoqërisë.
