Kryeministri Edi Rama prezantoi themelimin e Albanian Digital Solution Sh.A., iniciativë të re për modernizimin e shërbimeve dhe forcimin e inovacionit teknologjik në vend. Ai e përshkroi ditën si të rëndësishme për “revolucionin digjital” dhe transformimin e qeverisjes përmes teknologjisë, duke vënë në dukje nevojën që lind në fazën e re të zhvillimit elektronik të shtetit.
Rama përmendi si shembull AKSHI-n, të cilën e cilësoi si një histori suksesi që ka kaluar një rrugë të vështirë: nga një numër i vogël shërbimesh në fillim, ajo ka arritur të ofrojë mbi 1,200 shërbime publike online dhe të fitojë mbi 3 milionë përdorues, një zhvillim që u përshpejtua edhe nga momentet dramatike të pandemisë. Ai vuri në dukje rolin e platformës E-Albania gjatë pandemisë, që sipas tij shërbeu si “shpëtimtar” për shëndetin e shqiptarëve duke lehtësuar zbatimin e masave kufizuese.
Në fjalën e tij, Rama theksoi se sistemi ka nevojë për financim të shtuar, si për ndërtimin ashtu edhe për mirëmbajtjen. Nga kjo nevojë del edhe domosdoshmëria për të ndarë udhëheqjen e qeverisjes elektronike në funksione si përcaktimi i standardeve, koordinimi i aktorëve të përfshirë, dhe kontrolli i cilësisë dhe përputhshmërisë në nivel operacional.
Qëllimi i Albanian Digital Solution Sh.A., sipas Ramës, është të krijojë një kompani të suksesshme në treg që tërheq talente, ofron paga më të larta dhe garanton vazhdimësinë teknike, përgjegjësinë institucionale dhe qytetare ndaj publikut, si dhe matshmërinë e shërbimit. Ai po ashtu argumentoi se shpenzimet aktuale për mirëmbajtje që shkojnë te kompanitë private mund të kursen shtetit brenda një harku trevjeçar dhe të ridestinohen si investime për AKSHI-n përmes Albanian Digital Solution Sh.A.
