Një ish-zyrtar i lartë i qeverisë amerikane, identifikuar në dokumente gjyqësore si David Rush, u arrestua në SHBA pasi agjentët e FBI-së gjetën në banesën e tij në Virxhinia qindra shufra ari me vlerë mbi 40 milionë dollarë. Sipas dokumenteve, Rush dyshohet se ka bërë kërkesa të përsëritura ndaj qeverisë amerikane për të marrë sasi të mëdha ari dhe valutë të huaj për “shpenzime zyrtare” dhe është akuzuar për përvetësim të fondeve publike.
“New York Times” raporton se Rush deri vonë ka mbajtur një pozicion të lartë në CIA. Ai u arrestua dhe mbahet në paraburgim deri në seancën dëgjimore që pritet këtë javë; avokati i tij nuk ka dashur të komentojë. Gjatë kontrollit të banesës, agjentët federalë sekuestruan gjithashtu rreth 2 milionë dollarë cash dhe 35 orë luksoze, sipas BBC.
Dokumentet e gjykatës bëjnë të ditur se Rush kishte akses në informacione tepër sekrete dhe ishte i autorizuar të menaxhonte materiale të klasifikuara. Ai akuzohet gjithashtu për deklarim të rremë mbi arsimin dhe shërbimin ushtarak gjatë aplikimeve për pozicione qeveritare, si dhe për përfitim të paligjshëm të pagesave dhe lejeve ushtarake me vlerë mijëra dollarë.
Sipas hetimeve, Rush ka punuar si drejtues i lartë në një agjenci qeveritare në Virxhinia. FBI njoftoi se arrestimi u krye më 19 maj, pas një referimi nga vetë CIA. Dokumentet e çështjes tregojnë gjithashtu se midis nëntorit 2025 dhe marsit 2026 ai i kishte kërkuar qeverisë “sasi të konsiderueshme valutash të huaja dhe dhjetëra miliona dollarë në shufra ari” për qëllime biznesi, që më pas dyshohet se i ka marrë.
Hetimi i brendshëm i CIA-s nuk gjeti gjurmë të shufrave të arit apo valutës së huaj që dyshohej t’i ishin dhënë Rush-it, dhe autoritetet thonë se nuk ka të dhëna të qarta për fatin e këtyre fondeve. Në kontrollin e kryer nga FBI më 18 maj u sekuestruan rreth 303 shufra ari, secila me peshë rreth një kilogram, me një vlerë totale që kalon 40 milionë dollarë; dokumentet ende nuk shpjegojnë pse ato ndodheshin në banesën e tij.
