Një aksident i rëndë me pasojë vdekjen u regjistrua mesditën e sotme në aksin Fier–Darëzezë, pranë fshatit Levan. Sipas informacionit paraprak, një automjet ka dalë nga rruga dhe ka përfunduar në një kanal, ndërsa si pasojë ka humbur jetën drejtuesi i tij, Gledis Çala, 37 vjeç.
Në vendngjarje mbërritën shërbimet e policisë, grupi hetimor dhe automjeti zjarrfikës, të cilët po punojnë për nxjerrjen e mjetit dhe për zbardhjen e plotë të rrethanave të aksidentit. Forcat zjarrfikëse ndërhynë për nxjerrjen e trupit, pasi automjeti tip “Renault Megane” kishte pësuar dëmtime të shumta. Sipas njoftimeve, dyshohet se aksidenti ka ndodhur disa orë më parë dhe është pikasur më vonë nga kalimtarë të rastit.
Njoftimi i policisë në lidhje me ngjarjen bën të ditur se në aksin rrugor “Fier–Darëzezë” shtetasi G. Ç., 37 vjeç, duke drejtuar automjetin, dyshohet se ka humbur kontrollin e mjetit dhe ka dalë nga rruga. Si pasojë e daljes së automjetit jashtë karrexhatës, drejtuesi i mjetit ka humbur jetën në vendngjarje. Grupi hetimor po punon për sqarimin e plotë të rrethanave dhe të shkakut të aksidentit, si dhe të kohës së ndodhjes së tij.
Informacionet e publikuara janë paraprake dhe autoritetet policore vazhdojnë hetimet për të përcaktuar shkakun dhe dinamikën e ngjarjes. Top Channel.
