Ekstradimet dhe operacionet ndërkombëtare kundër krimit të organizuar po intensifikohen, ndërsa krimi vazhdon të mos njohë kufij. Vetëm gjatë këtij viti drejt Shqipërisë janë ekstraduar ose transferuar 37 persona të kërkuar ndërkombëtarisht, ndërsa gjatë vitit 2025 numri arriti në 109 persona. Këto shifra pasqyrojnë një bashkëpunim të ngushtë mes autoriteteve shqiptare dhe partnerëve ndërkombëtarë në luftën kundër trafikut të drogës dhe organizatave kriminale.
Së fundmi nga Italia drejt Shqipërisë u ekstradua Sueld Elezi, i shpallur në kërkim ndërkombëtar nga SPAK. Sipas hetimeve, ai akuzohet se në bashkëpunim me persona të tjerë ka trafikuar në Itali fillimisht 2 kilogramë kokainë gjatë vitit 2020 dhe më pas 932 kilogramë kokainë në vitin 2021, si pjesë e një grupi të strukturuar kriminal që operonte mes Durrësit dhe Pulias dhe merrej me trafik ndërkombëtar të drogës dhe pastrim të parave. Operacioni i zhvilluar një vit më parë nga SPAK, autoritetet italiane dhe Eurojust çoi në lëshimin e 52 masave të sigurisë për anëtarë të këtij grupi kriminal. Gjykata e Posaçme këtij grupi i sekuestroi miliona euro pasuri, kompani ndërtimi, restorante, automjete luksoze dhe para cash.
Përveç atyre që kthehen në Shqipëri, disa persona po transferohen drejt vendeve ku akuzohen për vepra të rënda. Nga Tirana drejt Gjermanisë u ekstradua Roy Garin, i akuzuar për organizatë kriminale dhe mashtrim me shuma të mëdha në 33 raste. Ndërsa drejt Mbretërisë së Bashkuar u transferua Altin Shehu, i kërkuar për vrasje.
Shifrat dhe aksionet e fundit tregojnë intensifikim të bashkëpunimit ndërkombëtar dhe të masave ligjore kundër rrjeteve që angazhohen në trafik droge, pastrim parash dhe krime të tjera të organizuara, duke përfshirë sekuestrime të konsiderueshme pasurie dhe veprime të përbashkëta hetimore mes institucioneve shqiptare dhe partnerëve europianë.
