Tre persona u plagosën dhe një burrë u ndalua nga karabinierët pas një incidenti të mërkurën në Monticiano, në provincën e Sienës, pak para funeralit të Giovanna Regolit, bashkëshortes së ish-drejtuesit të futbollit italian Luciano Moggi. Sipas mediave italiane, autori, i cili përmendet si shtetas i huaj, humbi kontrollin dhe sulmoi së pari don Paolo Casagrande, priftin që do të drejtonte ceremoninë pas funeralit.
Më pas i njëjti person ka goditur edhe komandantin e stacionit lokal të karabinierëve dhe një qytetar tjetër që ndërhyri për ta neutralizuar. Autori fillimisht arriti të largohej duke përfituar nga rrëmuja dhe numri i madh i të pranishmëve, por më vonë u identifikua dhe u shoqërua në komisariat nga karabinierët.
Tre të plagosurit morën ndihmën e parë në vendngjarje dhe më pas u transportuan për trajtim në spitalin “Santa Maria alle Scotte” në Siena. Për shkak të incidentit, ceremonia mortore u drejtua më tej nga don Virgil Farcas Gherghina, prifti i Arcidossos.
Kryebashkiaku i Monticianos, Alessio Serragli, reagoi lidhur me ngjarjen, duke thënë se episode të tilla trondisin një komunitet të vogël si ai i tyre dhe duke shprehur solidaritet ndaj personave të sulmuar.
