Një organizatë kriminale e trafikut të drogës, e drejtuar nga Igli Kamberi, akuzohet nga autoritetet italiane për rrëmbimin dhe ekzekutimin mafioz të 26-vjeçarit Francesco Diviesti në Itali. I riu, me profesion parukier, u zhduk më 25 prill 2025 në Barletta; trupi i tij u gjet katër ditë më vonë në një zonë gurore mes Minervinos dhe Canosas.
Sipas hetimeve të Prokurorisë së Barit dhe autoriteteve antimafia, vrasja lidhet me një konflikt për një borxh droge prej disa qindra eurosh. Hetuesit dyshojnë se Diviesti u mor me forcë nga disa persona dhe më pas u ekzekutua me armë zjarri; pas vrasjes trupi i tij u dogj, veprim që hetuesit vlerësojnë si përpjekje për të fshehur gjurmët dhe për të dërguar një mesazh frikësues në ambientet kriminale.
Maria Marzocca, nëna e 26-vjeçarit, është shprehur: “Nga sot dimë se djali ynë u vra nga njerëz të rrezikshëm”. Ajo ka thënë gjithashtu: “Për ne kjo është përgjigjja e shtetit që prisnim prej një viti” dhe ka shtuar: “Kam vetëm një pyetje: çfarë lidhjeje kishte djali im me këto rrethana?”, duke theksuar se Francesco ishte i padënuar, punonte si parukier në biznesin e të atit dhe ishte vetë baba.
Për ngjarjen janë arrestuar Igli Kamberi, Nicola Di Benedetto dhe Antonio Lanotte, të cilët akuzohen si autorë të drejtpërdrejtë të krimit. Dy persona të tjerë janë vënë nën masa sigurie për favorez dhe fshehje informacioni. Hetimet kanë nxjerrë në dritë se grupi kriminal i drejtuar nga Kamberi vepronte prej kohësh në trafikun e lëndëve narkotike në rajonin e Puglias, ndërsa përfitimet dyshohen se transferoheshin në Shqipëri për t’u pastruar; në kuadër të operacionit autoritetet italiane kanë sekuestruar qindra mijëra euro.
Paralelisht me arrestimet në Itali janë ekzekutuar masa sigurie edhe në Shqipëri, në bashkëpunim me SPAK-un dhe autoritetet italiane antimafia, që po hetojnë lidhjet ndërkombëtare të grupit kriminal.
