Crystal Palace fitoi UEFA Conference League pas triumfit 1-0 ndaj Rayo Vallecano në finalen e luajtur në Leipzig. Ndeshja u zhbllokua në pjesën e dytë, ndërsa gjatë 45 minutave të para të dy ekipet patën raste të pastra por nuk shënuan.
Në fillim të ndeshjes Crystal Palace nisi më mirë, por Rayo Vallencano arriti të baraspeshojë lojën dhe krijoi rrezik në minutën e 25, kur Alemaon, pas një krosimi të De Frutos, goditi me një goditje fluturimthi që doli jashtë për vetëm pak centimetra. Në minutën e 39 spanjollët provuan sërish me një goditje nga Unai Lopez, por edhe ajo përfundoi jashtë portës së anglezëve. Pak para përfundimit të pjesës së parë Palace pati një rast të mirë me Mitchell, i cili u pasua saktë nga Wharton, por goditja me kokë përfundoi jashtë dhe skuadrat shkuan në pushim me barazimin 0-0.
Pjesa e dytë nisi me një mundësi për Mateta, por Lejeune ndërhyri dhe largoi topin përpara sulmuesit të Crystal Palace. Pas pak, skuadra e drejtuar nga Oliver Glasner arriti të zhbllokojë rezultatin: në minutën e 51 Mateta shfrytëzoi një top të kthyer nga portieri Batalla pas një gjuajtjeje të Wharton dhe e dërgoi në rrjetë, duke vendosur shifrat 1-0.
Goli dha krah Palace që kërkoi dyfishimin e avantazhit dhe pati raste të rëndësishme. Yeremi Pino goditi një goditje dënimi që preku dy shtyllat njëra pas tjetrës; topi i kthyer shkoi te Ratiu që për pak shkaktoi autogol, ndërsa tentim-largimi i tij u përplas në traversë. Vetëm pak sekonda më vonë portieri Batalla bëri një ndalesë të rëndësishme ndaj Mateta, duke shpëtuar Rayo-n. Spanjollët patën mundësi të tjera, veçanërisht me Ratiun, por nuk shfrytëzuan rastet e krijuara.
Ndeshja përfundoi 1-0 në favor të Crystal Palace, me golin e Matetas në minutën e 51. Me këtë fitore Palace bëhet ekipi i dytë anglez që fiton një trofe europian këtë sezon, pas Aston Villa-s në Europa League, dhe i treti anglez që fiton këtë trofe, pas West Ham në 2023 dhe Chelsea në 2025.
