Raporti mes Gerond Meçes dhe Daniel Shimës bëhet edhe më evident nëse i referohemi raporteve financiare mes subjekteve ABS dhe “Alu Glass”. Më 4 maj 2022, kompania e xhamave “Alu Glass” faturon me plot 15,3 milionë lekë, rreth 160 mijë euro, kompaninë e Meçes. Nuk dihet se çfarë shërbimi mund t’i ketë ofruar ky subjekt, që tregton fasada xhamash, një kompanie që operon në fushën e IT-së.
Avokati Ermal Hamataj vë në dukje praktika të dyshimta në tendera, duke thënë: “Në qoftë se ne shikojmë që janë të njëjtat firma që shpallen fituese, janë të njëjtat firma që ankimojnë prokurime karshi firmave të tjera, kjo nënkupton një qëllim zvarritjeje që të mos shkojë prokurimi jashtë këtyre 2, 3 apo 4 firmave, të cilat e kanë kthyer në një rutinë të zakonshme… ky kthehet në një rreth vicioz që të mos e lësh prokurimin të shkojë jashtë firmës së destinuar dhe në këtë moment, nëse e njëjta firmë herë shpallet fituese, herë shpallet ankimuese, herë shpallet tërheqëse, kjo nënkupton që aty diçka ka”.
Eksperti i ekonomisë Ergis Sefa shpreh dyshime për firmat e reja në fushën e IT-së kur mungon stafi i kualifikuar: “Pikërisht kjo është një nga ato problemet që ngrejnë pikëpyetje të mëdha… kur ti ke jo vetëm numër të reduktuar stafi, por edhe kualifikimet nuk përkojnë me shërbimet teknologjike që ti jep, atëherë kjo bën të mendosh, të ngresh një dyshim të arsyeshëm që kemi të bëjmë thjesht me një dhënie fiktive shërbimi sesa me dhënien e një produkti sipas rregullave të tregut”.
Raporti mes ABS dhe “Alu Glass”, që sipas tekstit kontrollohet nga Sokol Parllaku, i afërm me Daniel Shimën, bëhet më i qartë kur shtrihet hulumtimi jashtë Shqipërisë. Inside Story raporton se kompania e lidhur me Shimën po ndërton dy kulla në Prishtinë në bashkëpunim me “ABS Kosova” të Gerond Meçes dhe subjektin AESS, të kontrolluar nga Migena Shrëder. Roli i Shrëder në lojën e tenderave në AKSHI përmendet gjithashtu; ajo ka dhënë dëshmi në SPAK, që sipas tekstit godasin grupin rival të Meçes.
Analiza e kompanisë AESS tregon se në periudhën 2018-2023 subjekti ka ndryshuar pronësinë nëntë herë mes Shrëder dhe babait, përmes dhurimeve, lëvizje që përkojnë me shfaqjen e saj në tenderat e AKSHI-t brenda grupit të influencës të lidhur me Meçen dhe Shimën. Hamataj shton: “Në rast se ne shikojmë një person juridik i cili është krijuar para një muaji dhe futet në Agjencinë e Prokurimeve dhe fiton një kontratë me miliona euro, dyshimi lind… Në 50% të mundësive, administratori që figuron në këtë shoqëri nuk është përfituesi real i atyre të ardhurave”. Ai thekson se barrën e provës e ka prokuroria për të përcaktuar nëse kemi të bëjmë me pronarë të vërtetë apo prestanome.
