Një tjetër tender me “garë fantazmë” ngre pikëpyetje të forta mbi mënyrën si po shpërndahen fondet publike në Bashkinë Lezhë. Procedura për “Punime ndërtimi për nevoja të Ujitjes”, me fond limit 21.6 milionë lekë, është zhvilluar me vetëm një operator ekonomik në garë, duke ngritur dyshime serioze për mungesë reale konkurrence dhe favorizim të paracaktuar.
Tenderi i shpallur nga Bashkia Lezhë, me fond nga buxheti i shtetit dhe ai i bashkisë, përfundoi me shpalljen fituese të kompanisë “ULZA” Shpk, e cila ishte e vetmja firmë pjesëmarrëse në procedurë. Oferta fituese kap vlerën 20.4 milionë lekë pa TVSH, pra pothuajse sa fondi limit, çka shton edhe më shumë hijet e dyshimit mbi transparencën e garës.
Edhe pse procedura është klasifikuar si “Procedurë e Hapur”, fakti që vetëm një kompani paraqiti ofertë ngre alarmin për kritere të hartuara në mënyrë të tillë që të dekurajojnë konkurrencën dhe të favorizojnë një subjekt të caktuar.
Ekspertët e prokurimeve publike e konsiderojnë këtë fenomen si një nga format më problematike të përdorimit të tenderëve publikë, ku në letër ekziston gara, por në praktikë fituesi duket i paracaktuar. Afatet, kriteret teknike dhe kushtet administrative shpesh formulohen në mënyrë të tillë që vetëm një operator të mund të kualifikohet.
Tenderi me referencë REF-82953-04-22-2026 u shpall më 23 prill 2026 dhe dokumentet u dorëzuan më 8 maj 2026, ndërsa po atë ditë u zhvillua edhe procedura e tenderimit. Megjithatë, rezultati final nxori në skenë vetëm një konkurrent.
Në një kohë kur fondet publike duhet të garantonin transparencë dhe garë të ndershme, raste të tilla shtojnë dyshimet se miliona lekë të taksave të qytetarëve po qarkullojnë në një sistem të mbyllur klientelist, ku konkurrenca reale mbetet vetëm në dokumente.
