Konferenca Ndërqeveritare ka nisur në Bruksel dhe do të diskutojë edhe për anëtarësimin e Shqipërisë në BE. Në mbërritje në selinë e BE-së, kryeministri Edi Rama deklaroi: “Shqipëria është një vend që gjithmonë ka qenë 100 % në përputhje me politikën e jashtme të BE. Nuk kemi ndjerë ndonjëherë kënaqësi të kemi veto, kemi qenë vendi më pro BE, jemi fanatikë të BE”. Pas deklaratës pritet një foto familjare me përfaqësuesit e qeverive të ndryshme evropiane, ndërsa konference zyrtarisht do të nisë në orën 19:00.
Për Shqipërinë, takimi shërben për të konfirmuar përmbushjen e standardeve të ndërmjetme dhe për të vendosur standardet përmbyllëse për Grupin 1 “Bazat”. Ky grup përfshin Kapitullin 23, që i referohet gjyqësorit dhe të drejtave themelore, dhe Kapitullin 24, që lidhet me drejtësinë, lirinë dhe sigurinë. Në fokus janë gjithashtu funksionimi i institucioneve demokratike, reforma e administratës publike dhe kriteret ekonomike. Për më tepër, grupi përfshin edhe Kapitullin 5 për prokurimin publik, Kapitullin 18 për statistikën dhe Kapitullin 32 për kontrollin financiar.
Agjenda e ditës përcakton mbërritjen e kryeministrit Rama dhe delegacionit në Këshillin e Evropës në orën 18:50, pasuar nga foto familjare në orën 18:55. Nisja zyrtare e Konferencës Ndërqeveritare është caktuar në orën 19:00. Në përfundim të takimit, rreth orës 20:15, është planifikuar një konferencë për shtyp.
