Kombëtarja U-21 do të zhvillojë dy ndeshje miqësore ndaj Sllovenisë dhe Italisë si pjesë e përgatitjeve për Euro 2027, të cilin Shqipëria do të bashkëorganizojë. Trajneri Alban Bushi, në konferencë për shtyp, komentoi listën e grumbulluar dhe gjendjen e skuadrës.
Bushi theksoi se nga kampionati shqiptar ka pak lojtarë të moshës U-21; shumica vijnë nga jashtë. Do të preferonte më shumë futbollistë vendas për lehtësi monitorimi, por pranoi se brezi 2004/2005 në kampionatin shqiptar është i vogël. Sipas tij, çdo pjesëtar i grupmoshave ka potencial për të kaluar te Kombëtarja A, dhe historikisht rreth 80% e ekipit A kanë kaluar përmes ekipeve të moshave. Në lidhje me Brajan Grudën, Bushi tha se ka pasur kontakte disa vjeçare nga Drejtoria Teknike dhe që nëse ai nuk do të zgjidhte Gjermaninë, opsioni i parë do të ishte Shqipëria; shtoi se Gruda ka cilësi të përshtatshme sidomos për skemat 4-3-3 ose 4-2-3-1, por se te U-21 do të ishte sfidë për pozicionin, pasi skuadra luan pa sulmues anësor.
Bushi vlerësoi këtë grup si më të fortin që ka pasur ndonjëherë për nga kompaktesa dhe përkushtimi, edhe pse nuk e cilësoi si më të kualitativin. Ai përmendi përballjet e mira me Gjermaninë dhe Zvicrën dhe shprehu besim për ecurinë. Ka pasur kontakt me trajnerin e ekipit A; ky i fundit pyeti për 2-3 lojtarë, por palët ranë dakord të mos i largojnë tani për shkak të nevojave të U-21.
Për kundërshtarët, Bushi vlerësoi Italinë dhe Slloveninë si skuadra shumë të forta; Italia pritet pothuajse e sigurt në Europian, ndërsa Sllovenia vjen pas fitores 2-0 ndaj Norvegjisë dhe është fizikisht e fortë. Filozofia e Shqipërisë U-21 mbetet mbrojtje kompakte dhe kundërsulm. Bushi pranoi se nuk është i kënaqur me minutat që disa lojtarë morën gjatë sezonit, përmendi dëmtimet dhe nevojën që lojtarët të gjejnë klube për t’u aktivizuar, duke shtuar se ndeshjet e Europianit kërkojnë lojtarë fizikisht optimalë. Rashica dhe Gabriel Rama mungojnë për shkak të dëmtimeve, me shpresë rikthimi në shtator.
Ai përshëndeti transferimin e Maksutit në Rusi si një mundësi për më shumë minuta loje dhe zhvillim, dhe konfirmoi se po planifikohen grumbullime dhe miqësore shtesë si përgatitje për finalet e Europianit.
