Ditën e sotme, Ministri i Mbrojtjes i Republikës së Shqipërisë, Ermal Nufi, mikpriti homologun e tij, Ministrin e Mbrojtjes Kombëtare të Greqisë, Nikos Dendias, para takimit të këtij të fundit me kryeministrin Rama në Kryeministri. Në fokus të kësaj vizite zyrtare ishte forcimi i bashkëpunimit dypalësh Shqipëri-Greqi dhe vijimi i dialogut të ngushtë në fushën e mbrojtjes dhe sigurisë.
Nufi vlerësoi mbështetjen e Greqisë për rrugëtimin evropian të Shqipërisë dhe theksoi promovimin e stabilitetit dhe sigurisë rajonale, me veçori tek Ballkani Perëndimor, që sipas tij mbetet prioritet strategjik i përbashkët i dy vendeve. Ai nënvizoi se objektivi kryesor i Shqipërisë në rajon është avancimi i stabilitetit politik, sigurisë dhe zhvillimit ekonomik të qëndrueshëm, duke përmendur pjesëmarrjen e personelit shqiptar në misionet ndërkombëtare: EUFOR ALTHEA në Bosnjë-Hercegovinë dhe KFOR në Kosovë.
Ministri gjithashtu theksoi koordinimin e shkëlqyer midis forcave detare shqiptare dhe atyre greke përmes misioneve në Detin Egje dhe Mesdhe, duke përfshirë Operacionin “Sea Guardian” të NATO-s. Ai deklaroi se Shqipëria po ndërmerr përpjekje për forcimin dhe modernizimin e flotës së saj detare, një proces që pritet të rrisë sigurinë detare dhe praninë e Aleatëve në rajonin Adriatiko-Jonian.
Përveç aspektit operativ, Nufi vuri në dukje edhe ndërveprimin e fortë ndërmjet personelit ushtarak të dy vendeve përmes aktiviteteve të përbashkëta, edukimit ushtarak, programeve të trajnimit dhe shkëmbimit të ekspertizës. Ai theksoi rëndësinë e ri-vitalizimit të protokollit teknik mbi bashkëpunimin ushtarak mjekësor ndërmjet Shqipërisë dhe Greqisë, duke propozuar rikthimin e këtij kuadri sidomos në fushat e kujdesit shëndetësor të specializuar, trajnimit mjekësor dhe shkëmbimeve profesionale, në frymën e përfitimit të ndërsjellë dhe partneritetit strategjik.
