Mallorca është zyrtarisht i rënë nga La Liga dhe do të luajë në Segunda Division pas një sezoni të trazuar. Edhe pse fitoi 3-0 ndaj Real Oviedos në ndeshjen e fundit të kampionatit në stadiumin “Son Moix”, kjo fitore nuk mjaftoi për të shmangur rënien. Skuadra nga Balearet përfundoi kampionatin në vendin e 18-të me 42 pikë, ndërsa kombinimi i rezultateve nga fushat e tjera në javën vendimtare, ku gjashtë ekipe rrezikonin mbijetesën, rezultoi fatal për ta.
Rënia e Mallorcas sheh në sfond një sezon individual jashtëzakonisht të mirë të Vedat Muriqit, i cili u dallua si golashënuesi i dytë më i mirë në të gjithë La Ligën. Megjithatë, pranësia e një “bomberi” të tillë në sulm nuk i shpëtoi skuadrës nga rënia, duke nxjerrë në pah se problemet e klubit ishin më shumë sistemike: defektet në prapavijë zhvlerësuan punën ofensive të “Piratit”.
Për klubin, rrëzimi paraqitet si një goditje e rëndë dhe e papritur, sidomos duke pasur parasysh arritjet e kohëve të fundit. Në vitin 2024 Mallorca arriti finalen e Kupës së Mbretit dhe në prill të këtij sezoni mposhti Real Madridin 2-1, por mungesa e vazhdimësisë dhe pikët e lëna ndaj rivalëve mesatarë i kushtuan qëndrimit në elitë.
Së bashku me Real Oviedon, e rënë matematikisht disa javë më parë, dhe një skuadër të tretë, Mallorca do të rinisë rrugëtimin në ligën e dytë sezonin e ardhshëm. Tifozët e “Bermellones” përjetuan dëshpërim në tribunat e Son Moix, teksa lajmet e këqija nga stadiumet e tjera shuan çdo shpresë dhe zbehën gëzimin e fitores së fundit kundër Oviedos. Në prag të merkatos, mbetet pyetja kryesore për të ardhmen e Vedat Muriqit dhe se çfarë do të vendosë klubi për të rrëzuar pasojat e këtij dështimi sportiv.