Tek Reali i Madridit pritet të ketë garë për postin e presidentit, një skenar që nuk është regjistruar që nga viti 2006. Enrique Riquelme prezantoi të shtunën kandidaturën e tij për kryesinë e klubit. Komiteti Elektoral ka një ditë për të ekzaminuar dokumentacionin e paraqitur; nëse gjithçka rezulton e rregullt, ai duhet të përcaktojë datën e zgjedhjeve brenda 15 ditësh.
Riquelme arriti në zyrat e Komitetit rreth orës 18:00 të së shtunës, pas certifikimit të garancisë bankare te një noter. Parashikimi ishte që paraqitja të bëhej në mëngjes, por ajo u shty për pasdite për shkak të disa mbledhjesh që e mbajtën të zënë deri në drekë. Në orët e fundit para paraqitjes, garancia bankare e kandidatit u bë çështje debati në media, pasi Banka Santander dhe BBVA i kanë refuzuar garancinë.
Statutet e Realit përcaktojnë se garancia nuk duhet domosdoshmërisht të jetë nga një bankë spanjolle, por duhet të jetë nga një institucion i regjistruar në Bankën e Spanjës, ku janë të regjistruara shumica e bankave që operojnë ndërkombëtarisht. Riquelme ka siguruar më pas garancitë nga Scotiabank dhe Andbank, çka i ka lejuar paraqitjen e kandidaturës.
Florentino Perez është president i klubit që nga 2009, dhe në këtë mandat të dytë është rizgjedhur pa kundërshtar në vitet 2009, 2013, 2017, 2021 dhe 2025. Herën e fundit që ai mori pjesë në një garë me kundërshtarë ka qenë në 2004, kur fitoi me 21,377 vota (91.6%) kundrejt 1,189 votave (5.08%) të Lorenzo Sanz dhe 458 votave (1.96%) të Arturo Balsadano. Ndërkaq, hera e fundit që anëtarët e Realit votuan ishte në 2006, kur u zgjodh Ramon Calderon.
Komiteti Ekzekutiv do të vendosë datën e zgjedhjeve pas verifikimit të kandidaturës së Enrique Riquelmes. Afati maksimal prej 15 ditësh për përcaktimin e datës skadon më 8 qershor, ndërsa votimet mund të zhvillohen në stadiumin Santiago Bernabéu ose në qendrën Valdebebas.
