Policia e Shtetit ka intensifikuar kontrollet dhe operacionet për kapjen e personave të shpallur në kërkim ndërkombëtar, në kuadër të bashkëpunimit me autoritetet partnere europiane. Gjatë 24 orëve të fundit janë finalizuar dy operacione të koduara, që çuan në arrestimin e dy shtetasve të kërkuar nga drejtësia italiane për vepra të ndryshme penale.
Sipas njoftimit të Policisë, brenda 24 orëve u finalizuan operacionet “Operacionalja 94” dhe “The Wanted”. Në vijim të punës për kapjen e personave të shpallur në kërkim ndërkombëtar, shërbimet e Drejtorisë së Forcës së Posaçme Operacionale, në kuadër të operacionit “Operacionalja 94”, lokalizuan dhe kapën në Kavajë shtetasin Saimir Dakoli, 48 vjeç, banues në Kavajë. Gjykata e Apelit e Venecias/Itali e ka dënuar me 7 vjet e 4 muaj burgim; nga ky dënim i kanë mbetur për të vuajtur 6 vjet, 4 muaj e 20 ditë burgim për veprën penale “Trafikim i lëndëve narkotike”.
Në Durrës, në kuadër të operacionit “The Wanted”, Seksioni për Mbështetjen Operacionale të Hetimit pranë DVP Durrës, në bashkëpunim me Forcën e Posaçme “Shqiponja”, lokalizoi dhe arrestoi në lagjen nr. 1 shtetasin Elton Stafa, 47 vjeç, banues në Shijak, i njohur edhe me aliaset Elton Zani, Seit Stafa, Sadik Dervishi, Vladi Ymeri dhe Hasan Ymeri. Gjykata e Apelit në Milano/Itali e ka dënuar me 5 vjet e 7 muaj burgim për vepra të parashikuara nga legjislacioni penal italian: “Plagosje e rëndë me dashje”, “Mbajtja e sendeve të vjedhura” dhe “Mbajtja pa leje e armëve”.
Vijon bashkëpunimi ndërmjet Interpol Tiranës dhe Interpol Romës për finalizimin e procedurave për ekstradimin e dy shtetasve të kapur.
Top Channel
