Analisti Kim Mehmeti, i ftuar në emisionin “Top Story” me Gridën Duma, komentoi lëvizjen studentore të studentëve shqiptarë në Shkup për gjuhën shqipe dhe rolin e ambasadorit të Shqipërisë në Maqedoninë e Veriut, Denion Meidani. Mehmeti tha se tërheqja e Meidanit do të ishte turp për Tiranën dhe do t’i jepte fund zërit studentor, duke i dhënë forcë dhe kurajo qarqeve anti-shqiptare në Maqedoni. Ai e përshkroi zërin studentor si “zërin e munguar të shqiptarisë” dhe theksoi rëndësinë e vrullit rinor në artikulimin e çështjeve kombëtare.
Mehmeti kritikon politikat e mëparshme të Tiranës, sipas tij inferiore para ardhjes së këtij ambasadori, që kanë çuar në dërgimin e “ambasadorëve teknikë” që nuk merreshin me çështjen shqiptare por me aktivitetet e partive dhe evenimente të tjera. Ai tha se kjo qasje krijoi përshtypjen se shqiptarët ishin “popull pa mëmëdhe” dhe se, kur Tirana nuk tregohet e angazhuar për shqiptarët, atëherë kush duhet të merret me to. Në këtë kontekst Mehmeti paralajmëroi se një tërheqje e ambasadorit do të forconte diskursin anti-shqiptar dhe do të demobilizonte përpjekjet studentore.
Analisti shtoi se Maqedonia shpesh ankohen tek ndërkombëtarët dhe përfitojnë nga kjo, por sipas tij Tirana dhe Prishtina nuk i kanë thënë ndërkombëtarëve se elita maqedonase nuk dëshiron një Maqedoni ku flitet shqip apo ku shqiptari arsimon në gjuhën shqipe. Ai argumentoi se nëse Tirana dhe Prishtina vlerësojnë më shumë pëlqimin e Beogradit e Shkupit sesa mbështetjen e shqiptarëve në Luginën e Preshevës, Maqedoni dhe Mal të Zi, atëherë po dërgojnë sinjale të gabuara për përfaqësimin e interesave shqiptare.
Përfundimisht Mehmeti paralajmëroi se nëse ndjeket politika e tillë, nuk do të ketë më zë studentor dhe Maqedonia do të shihet si “filiali politik i Beogradit” që aplikon politikë serbe ndaj shqiptarëve.
