Rusia dhe Kina njoftuan të mërkurën se planet e presidentit amerikan, Donald Trump, për mburojën raketore “Kupola e Artë” kërcënojnë stabilitetin strategjik, dhe akuzuan Uashingtonin për sjellje të papërgjegjshme duke mos punuar për zëvendësimin e një traktati historik bërthamor. Kritikën e shprehën në një deklaratë të përbashkët, pas takimit mes presidentit kinez Xi Jinping dhe atij rus Vladimir Putin në Pekin.
Sipas deklaratës, projekti “Kupola e Artë” synon zgjerimin e mbrojtjes tokësore me raketa interceptuese, sensorë dhe sisteme komandë-e-kontrolli, si dhe shtimin e elementeve hapësinore të destinuara për të zbuluar, gjurmuar dhe potencialisht rrëzuar kërcënimet hyrëse nga orbita. Këto elemente do të përfshinin rrjete të avancuara satelitore dhe armë orbitale, ndërtimin e një sistemi shumëdimensional dhe global mbrojtjeje raketore që do të synonte shkatërrimin e të gjitha llojeve të raketave, përfshirë ato të “kundërshtarëve të barabartë”, në të gjitha fazat e fluturimit dhe edhe para se të lëshoheshin.
Deklarata vlerëson se një projekt i tillë, i cili kërkon një kapacitet të pakufizuar dhe global për të neutralizuar raketat në çdo fazë, paraqet një kërcënim të qartë për stabilitetin strategjik. China dhe Rusia shprehin gjithashtu keqardhje për “politikën e papërgjegjshme” të Shteteve të Bashkuara, që lejonte skadimin e traktatit të kontrollit të armëve bërthamore New START të vitit 2010 në fillim të vitit, pa një marrëveshje zëvendësuese.
Rusia deklaroi se mbështet qëndrimin e Kinës për të mos marrë pjesë në bisedime të mundshme SHBA-Rusi për kontrollin e armëve bërthamore, duke lënë të nënkuptohet refuzimin e përfshirjes së Kinës në negociata të tilla sipas kushtave aktuale.
