Presidenti Bajram Begaj zhvilloi një vizitë zyrtare në Sllovaki me ftesë të homologut Peter Pellegrini. Gjatë takimit të zgjeruar mes delegacioneve, dy presidentët diskutuan për avancimin e marrëdhënieve dypalëshe, perspektivën evropiane të Shqipërisë dhe Ballkanit Perëndimor, si dhe për sfidat e sigurisë si aleatë në NATO.
Në konferencën e përbashkët për mediat, Begaj vlerësoi mbështetjen e vazhdueshme të Sllovakisë për procesin e integrimit të Shqipërisë në Bashkimin Evropian, duke e cilësuar atë partner dhe aleat të rëndësishëm. Ai theksoi progresin në negociata dhe ambicien për të përmbyllur grup-kapitujt brenda vitit të ardhshëm, me objektivin strategjik të anëtarësimit të plotë në BE në vitin 2030. Në fjalën e tij përmendi: “Shqipëria ka hapur për një vit të gjithë grupkapitujt, një kohë rekord, dhe synon mbylljen e tyre në vitin 2027 dhe për t’u bërë pjesë e Bashkimit Evropian si anëtare në vitin 2030.” Begaj falënderoi shtetin dhe qeverinë sllovake për mbështetjen dhe shprehu besimin se ajo do të vazhdojë.
Kreu i Shtetit theksoi se strukturat e BE kanë njohur progresin e Shqipërisë në reformat e thella dhe përparimin institucional, duke nënvizuar rolin e Sllovakisë si një nga avokatet më të rëndësishme të procesit të anëtarësimit dhe kontributin e saj me ekspertizë. Ai gjithashtu çmoi mbështetjen e qytetarëve sllovakë për zgjerimin e BE me vendet e Ballkanit Perëndimor dhe angazhimin e Sllovakisë në grupin “Miqtë e Ballkanit Perëndimor”.
Dy presidentët konfirmuan vullnetin për thellimin e bashkëpunimit në fusha si energjia, turizmi, bujqësia, shëndetësia, energjia e rinovueshme dhe tranzicioni i gjelbër. Ata theksuan nevojën për institucionalizimin e bashkëpunimit përmes zbatimit të marrëveshjeve ekzistuese dhe krijimit të instrumenteve të reja partneriteti. U vlerësua gjithashtu krijimi i linjave direkte fluturimi Tiranë–Bratislavë si mundësi për afrim të dy popujve.
Për rajonin, Begaj theksoi se stabiliteti i Ballkanit Perëndimor është thelbësor për sigurinë e Evropës dhe se integrimi evropian i rajonit duhet të mbetet prioritet strategjik i BE-së. Ai falënderoi Sllovakinë për prezencën me trupa në KFOR dhe shprehu besimin për një rivlerësim të qëndrimit të saj ndaj Kosovës, së paku në mosbllokimin e rrugëtimit të saj drejt organizatave ndërkombëtare. Gjatë qëndrimit në Bratislavë, Begaj u takua edhe me kryeministrin Robert Fico dhe kryetarin e Këshillit Kombëtar Richard Raši, ku mori mbështetje për anëtarësimin e Shqipërisë në BE. Ai nderoi gjithashtu viktimat e komunizmit në memorialin “Porta e Lirisë”.
