Shoqëria Mabco Constructions S.A. reagoi zyrtarisht pas bllokimit për të dytën ditë me radhë të hyrjes së punonjësve dhe inxhinierëve në kantierin e Aeroportit Ndërkombëtar të Vlorës. Sipas kompanisë, rreth 200 punonjës, inxhinierë dhe specialistë janë penguar fizikisht të hyjnë në ambientet e projektit që, siç thekson Mabco, është ndërtuar kryesisht me investimet e saj.
Mabco deklaron se zotëron 98% të kuotave të shoqërisë koncesionare “Vlora International Airport – VIA” dhe ka investuar mbi 90 milionë euro në projekt. Kompania thotë se nuk ekziston asnjë vendim gjyqësor që ndalon hyrjen e saj apo të nënkontraktorëve në kantier. Sipas reagimit, vendimi gjyqësor që është përmendur publikisht nga pala tjetër lidhet vetëm me pezullimin përkohshëm të së drejtës së votës së Mabco-s në shoqëri, çështje që aktualisht po shqyrtohet në Gjykatën e Lartë.
Në deklaratë Mabco e përshkruan ndalimin e hyrjes si “vetëgjyqësi” të Valon Ademit dhe ortakut minoritar me 2% të kuotave, të kryer sipas saj përmes administratorëve të kontestuar Vegim Hoxha dhe Bujar Ejupi. Kompania thekson se nuk ka qenë dhe nuk është nënkontraktor i VIA-s, por ortaku mazhoritar dhe investitori kryesor, siç përcaktohet në kontratën e koncesionit.
Mabco kërkon nga autoritetet qeveritare dhe Autoriteti Kontraktues (Ministria e Infrastrukturës dhe Energjisë) që të garantojnë aksesin e lirë në hyrje dhe dalje të kantierit, sipas nenit 7.1 pika (b) dhe (c) të kontratës së koncesionit. Kompania vlerëson se mosveprimi i autoriteteve ndaj këtij ndalimi përbën mosplotësim të detyrimeve kontraktore nga ana e shtetit.
Ekipi ligjor i Mabco-s njoftoi Kryeministrin, Ministrin e Infrastrukturës dhe Energjisë dhe Drejtorin e Përgjithshëm të Policisë së Shtetit për situatën dhe për, siç thuhet, dështimin e Policisë së Vlorës për të garantuar rendin publik, sigurinë dhe mbrojtjen e pronës së investuar. Kompania i kërkon autoriteteve të ndalojnë vetëgjyqësinë, të garantojnë aksesin e papenguar të punonjësve dhe të ruajnë terminalin dhe veprën e ndërtuar, dhe njofton se do të ushtrojë të gjitha të drejtat ligjore, civile dhe penale ndaj çdo personi që cenon investimin dhe interesin e projektit.
