Nga sot deri të enjten zhvillohet Turi Çiklistik i Shqipërisë 2026, ndërsa disa rrugë do të jenë të bllokuara; bllokimet e sotme përfshijnë Tiranën. Policia njofton se ka hartuar një plan masash për garantimin e mbarëvajtjes së aktivitetit ndërkombëtar sportiv, të ndarë në pesë etapa që do të zhvillohen më datat 18-22 maj 2026. Turneu organizohet në bashkëpunim me Federatën Shqiptare të Çiklizmit, Ministrinë e Turizmit, Kulturës dhe Sportit, Komitetin Olimpik Kombëtar Shqiptar dhe bashkitë përkatëse. Në aktivitet do të marrin pjesë skuadra nga Shqipëria, vendet e Ballkanit dhe Europa. Ngjarja është Turi i 83-të Çiklistik i Shqipërisë.
Policia e Shtetit ka hartuar një plan të posaçëm masash për të angazhuar strukturat vendore të Policisë, shërbimet e Policisë Rrugore dhe strukturat mbështetëse, me objektiv garantimin e rendit publik dhe sigurisë rrugore, eskortimin e çiklistëve dhe mbarëvajtjen e aktivitetit gjatë gjithë itinerarit. Aksionet përfshijnë kufizime të përkohshme të qarkullimit në segmente të ndryshme, me apel për mirëkuptim dhe rekomandim për përdorimin e akseve alternative.
Itinerari i etapave dhe oraret e bllokimit janë si më poshtë:
– Etapa I, 18.05.2026, orari i bllokimit 12:00: Sheshi “Skënderbej” – bulevardi “Zogu i Parë” – rruga “Dedë Gjo Luli” – rruga “Myslym Shyri” – bulevardi “Dëshmorët e Kombit” – rruga “Lekë Dukagjini” – rruga “Ibrahim Rugova” – bulevardi “Gjergj Fishta” – Unaza e Madhe – autostrada Tiranë–TEG–Thumanë–Milot–Rrëshen–Reps – kthimi për në Milot – finishi në Lezhë.
– Etapa II, 19.05.2026, orari i bllokimit 12:00: Lezhë–Vorë–Golem–Rrogozhinë – finishi në Elbasan.
– Etapa III, 20.05.2026, orari i bllokimit 12:00: Elbasan–Belsh–Kuçovë–Lushnjë–Unaza e Fierit – finishi në Vlorë.
– Etapa IV, 21.05.2026, orari i bllokimit 12:00: Vlorë–Tuneli i Llogarasë–Himarë–Kuç–Lepincë–Kotë – finishi në Vlorë.
– Etapa V, 22.05.2026, orari i bllokimit 10:00: Vlorë–Rrethrrotullimi i Lushnjës – finishi në Fier.
Strukturat e Policisë së Shtetit do të jenë maksimalisht të angazhuara për garantimin e sigurisë dhe mbarëvajtjen e këtij eventi sportiv ndërkombëtar. Top Channel.
