Organizata Botërore e Shëndetësisë ka shpallur shpërthimin e Ebolës në lindje të Republikës Demokratike të Kongos një emergjencë shëndetësore publike me shqetësim ndërkombëtar. Sipas OBSH-së, në provincën Ituri janë raportuar rreth 246 raste të dyshuara dhe 80 viktima, ndërsa autoritetet paralajmërojnë se numri real i të infektuarve mund të jetë më i lartë dhe ekziston rrezik i shtuar për përhapje të mëtejshme.
Virusi i identifikuar është lloji Bundibugyo, për të cilin aktualisht nuk ka vaksinë apo trajtim të miratuar. Tetë raste janë konfirmuar në laborator, ndërsa rastet e dyshuara janë regjistruar në disa zona, përfshirë qytetin Bunia dhe zonat minerare Mongwalu dhe Rwampara. OBSH-ja konfirmoi gjithashtu se virusi ka kaluar kufirin, pasi dy raste janë raportuar në Ugandë; një 59-vjeçar në vendin fqinj humbi jetën pasi rezultoi pozitiv me Ebola.
Agjencia ndërkombëtare i ka bërë thirrje autoriteteve në RD të Kongos dhe Ugandë të forcojnë monitorimin, izolimin e rasteve dhe masat parandaluese për të frenuar përhapjen. Megjithatë, OBSH theksoi se nuk rekomandohet mbyllja e kufijve apo kufizimi i udhëtimeve dhe tregtisë, pasi masa të tilla “nuk kanë bazë shkencore”.
Ebola u zbulua për herë të parë në vitin 1976 në territorin e sotëm të Republikës Demokratike të Kongos. Sëmundja përhapet përmes kontaktit me lëngjet trupore dhe shkakton ethe të larta, gjakderdhje dhe dëmtime të organeve. Ky është shpërthimi i 17-të i Ebolës në vend; shpërthimi më i rëndë u regjistrua mes viteve 2018-2020, kur humbën jetën afro 2,300 persona.
Raporti i OBSH-së evidenton nevojën për masa të shpejta dhe të koordinuara të përgjigjes, duke përfshirë rritjen e kapaciteteve laboratorike, vijueshmërinë e hetimeve epidemiologjike dhe komunikimin me komunitetet e prekura për të parandaluar përkeqësimin e situatës.
