Marrëdhëniet mes Gjermanisë dhe SHBA-së, pas periudhave të tensionuara, duket se janë qetësuar pas një bisede telefonike midis kancelarit gjerman Friedrich Merz dhe presidentit amerikan Donald Trump. Merz njoftoi në platformën X se biseda kishte qenë “e mirë” dhe se të dy janë dakord që Irani duhet të rikthehet në tryezën e negociatave. Sipas njoftimeve nga të dy udhëheqësit, Ngushtica e Hormuzit duhet të mbetet e hapur dhe Irani nuk duhet të zotërojë armët bërthamore.
Në telefonatë u diskutuan gjithashtu gjetja e një zgjidhjeje paqësore për Ukrainën dhe përgatitjet për samitin e NATO-s në Ankara, i cili pritet të zhvillohet në fillim të qershorit. Merz theksoi se “SHBA-ja dhe Gjermania janë partnerë të fortë në një NATO të fortë.” Trump, gjatë telefonatës, ndodhej në avion në fluturimin e kthimit nga Kina, ku kishte takuar presidentin kinez Xi Jinping; edhe atje siç raportohet, Irani ishte temë kryesore. Deri tani Trump nuk është shprehur publikisht për bisedën me Merzin.
Historia e marrëdhënieve personale mes Merz dhe Trump është përshkruar si zakonisht e mirë, por së fundmi përplasjet u intensifikuan pas disa deklaratave të kancelarit gjerman. Gjatë një aktiviteti me nxënës në Sauerland, Merz pati thënë se SHBA-ja duket se nuk ka një strategji të qartë në luftën me Iranin dhe se, duke iu referuar negociatave të bllokuara, “një komb i tërë po poshtërohet nga udhëheqja shtetërore iraniane.” Pas këtyre deklaratave, Trump e akuzoi Merzin se nuk e di për çfarë po flet dhe kërcënoi se do të shqyrtonte tërheqjen e trupave amerikane nga Gjermania.
Në fillim të majit, qeveria amerikane njoftoi tërheqjen e 5,000 trupave të stacionuara në Gjermani; Ministria e Mbrojtjes e justifikoi vendimin me një rishikim të detajuar të stacionimit të forcave amerikane në Evropë. Trump ka akuzuar vazhdimisht Gjermaninë dhe partnerë të tjerë të NATO-s për mungesë mbështetjeje ndaj SHBA-së në konfliktin me Iranin, duke bërë të qartë pritshmërinë që NATO, si aleancë mbrojtëse, të reagojë në rast sulmi ndaj një anëtari.
