Arbitrat spanjollë reaguan ndaj akuzave të presidentit të Realit të Madridit, Florentino Perez, dhe nisën procedurat për t’u mbrojtur. Sindikata e arbitrave i dërgoi Komisionit të Garave një letër ku kërkon hapjen e procedimit disiplinor ndaj Perez dhe që Reali i Madridit të kërkojë ndjesë publike. Ata po ashtu kërkojnë dëmshpërblim për dëmin moral, reputacional dhe profesional të Kolektivit Arbitrar.
Deklaratat e Perez në një konferencë për shtyp dhe në një intervistë televizive akuzuan arbitrimin për korrupsion të strukturuar dhe vjedhje të titujve, gjë që shkaktoi indinjatë te arbitrat. Në konferencë Perez tha: “Kam qenë këtu për shumë sezone, kam fituar 7 Champions dhe 7 Liga, sepse të tjerat m’i kanë vjedhur. Korrupsion sistematik për 2 dekada dhe vazhdojnë të jenë të njëjtët arbitra.” Në intervistën e mëvonshme ai deklaroi: “Vazhdojnë të jenë të njëjtët arbitra duke bërë të njëjtat gjëra në mënyrë të pacipë. Në këtë sezon nga kanë mohuar 16 apo 18 pikë.”
Sindikata thekson se këto deklarata tejkalojnë kufijtë e së drejtës për të folur dhe kritikës sportive, duke i atribuar trupit arbitrar kryerjen e një krimi të korrupsionit të vazhdueshëm gjatë dy dekadave. Si kërkesë konkrete, sindikata i kërkon Komisionit të Garave që t’i kërkojë Perezit që të ndalojë deklaratat e tilla gjatë procedimit, që të dëmshpërblejë kolektivin dhe që Reali i Madridit të publikojë një komunikatë ku të kërkohet ndjesë.
Para se të bënin denoncimin publik, sindikata priti përfundimin e ndeshjes midis Realit dhe Oviedos, si shenjë respekti ndaj kompeticionit dhe klubeve të tjera, por në komunikatë theksohet se kjo pritje nuk i frikëson nga akuzat që i kanë shqetësuar. Në denoncim arbitrat përshkruajnë veprimet e Perez si “një sulm i rëndë, i pajustifikuar dhe sistematik ndaj nderit profesional dhe institucional të Kolektivit Arbitra, pa asnjë rezolutë gjyqësore.” Top Channel.
