Autoriteti Kombëtar i Ushqimit (AKU) bëri publike një ditë më parë të dhënat lidhur me ngjarjen e helmimit të 56 studentëve të Akademisë së Sigurisë dhe njoftoi se ka marrë një masë administrative ndaj kompanisë Sori Al. Megjithatë, nga raportimi i AKU rezulton se analizat e kryera në nëntë mostra nuk i janë përcjellë ende prokurorisë, sipas informacionit të transmetuar.
Gazetarja Anila Hoxha raporton se grupit të hetimit penal që po trajton çështjen nuk i është dorëzuar ende asnjë dokument zyrtar nga autoritetet përkatëse. Në mënyrë jozyrtare, Prokuroria konfirmoi për Top Channel se hetuesit menjëherë pas rastit kanë kërkuar nga AKU raportet e mëparshme të gjurmueshmërisë së ushqimeve dhe produkteve, duke synuar të zbulojnë nëse ekzistojnë të dhëna paraprake mbi kontrollin e kompanisë së kateringut.
Prokurori Bledar Valikaj, që po ndjek hetimet, kërkon të sqarojë nëse autoritetet kanë kontrolluar më parë kompaninë e kateringut, nëse produktet e saj janë analizuar ndonjëherë dhe cilat konkluzione kanë nxjerrë ekspertët dhe masat e marra nga institucionet përgjegjëse. Ky verifikim pritet të jetë pjesë e dokumentacionit që do të përcaktojë drejtimin e hetimit penal.
Prokuroria është gjithashtu në pritje të përgjigjeve nga Instituti i Mjekësisë Ligjore për 52 nga 56 studentët që u trajtuan në spital në datën 6 maj. Shërbimi infektiv i spitalit ka karakterizuar gjendjen e studentëve, që janë kandidatë për oficerë policie, si “gastroenterit akut i dyshuar”. Megjithatë, rezultatet laboratorike të IML, të cilat duhet të përbëjnë aktin ekspertizë, janë të nevojshme për të përcaktuar hapat e mëtejshëm në hetim.
Sakaq, Gjykata Penale e Tiranës ka vendosur të lërë të lirë, nën masën e detyrimit për t’u paraqitur, kuzhinierin Kujtim Ballgjini dhe teknologun e ushqimit të Akademisë së Sigurisë, të cilët u arrestuan menjëherë pas shtrimeve në spital. Gjatë seancës me dyer të mbyllura, Ballgjini u shpreh me lot para gjykatës se “Unë kam 30 vjet kuzhinier, kam punuar edhe në gardën e Republikës dhe kurrë po kurrë s’më kanë ndodhur incidente të tilla.” Top Channel.
