Rrugët e Barcelonës u mbushën me ngjyrat “Blaugrana” më 11 maj 2026 për të festuar titullin e 29-të të La Ligës. Gjatë paradës, ylli 18-vjeçar Lamine Yamal mori dhe valëviti një flamur të Palestinës para qindra mijëra fansave, një akt që shpejt u përhap dhe çoi në një përplasje politike ndërkombëtare.
Në Izrael, reagimi ishte i ashpër. Ministri i Sigurisë Kombëtare, Itamar Ben-Gvir, deklaroi se kushdo që identifikohet me “flamurin e terrorizmit” dhe e valëvit atë gjatë një feste “nuk duhet të habitet nga urrejtja dhe reagimi i izraelitëve”, duke shtuar se sporti nuk mund të jetë strehë për “nxitësit e dhunës”. Media zyrtare izraelite, Channel 12, akuzoi Yamalin se “ka zgjedhur të shfrytëzojë një paradë fitoreje dhe një platformë me miliona ndjekës për të shpërndarë agjenda politike përçarëse”, duke e cilësuar veprimin si provokim. Kritikat u përforcuan edhe në rrjetet sociale nga gazetarë dhe aktivistë izraelitë, disa duke e quajtur “të pështirë” dhe duke bërë thirrje që ai të ndëshkohet para Botërorit 2026.
Ndërsa reagimet në Izrael ishin të ashpra, në Rripin e Gazës gesti i Yamalit u përshëndet si shpresë. Artistët palestinezë realizuan një murale gjigante në kampin e refugjatëve Al-Shati, të pikturuar mbi rrënojat e një ndërtese të shkatërruar, dhe gjatë përurimit thanë se piktura është “dhurata jonë për Lamine Yamal”. Ata shprehën se ai në Gazë konsiderohet “një djalë i Palestinës” sepse, sipas tyre, “guxoi të na shihte kur bota mbyllej sytë”.
Pas presionit mediatik, Yamal doli me një qëndrim të prerë dhe nuk tërhoqi veprimin. Në deklaratën e tij tha se veprimet e tij “udhëhiqen vetëm nga empatia njerëzore dhe ndjenja e drejtësisë” dhe se është krenar për identitetin, rrënjët dhe besimin e tij musliman. Ai shtoi se ata që përdorin fenë apo origjinën e tij për ta sulmuar “shpërfaqin injorancën dhe racizmin e tyre”, dhe deklaroi se “Futbolli është për empati, jo për heshtje”.
