Megjithë akuzat e forta, kryesisht nga kryetari i PD-së, Sali Berisha, në seancën e sotme në Kuvend mbizotëroi një klimë konsensusi që pritet të kulmojë me votimin e një draftrezolute të përbashkët, të hartuar nga shumica dhe opozita. Pa shumë vëmendje mediash, të dy palët u mblodhën në Komisionin e Jashtëm dhe diskutuan për një draft të përbashkët lidhur me anëtarësimin në Bashkimin Evropian. Publikisht, opozita deklaroi se shumica “ishte dorëzuar” dhe kishte pranuar propozimet e saj.
Një nga pikat kyçe të draftit, që opozita thotë se ishte kërkesë e saj, synon të vendosë si qasje atë të anëtarësimit të plotë në BE: “Të refuzojë çdo nismë, akt apo veprim që devijon nga kursi i qenësishëm i anëtarësimit të plotë të Shqipërisë në Bashkimin Evropian.” Sipas opozitës, ky paragraf pason një letër të përbashkët mes kryeministrit Rama dhe presidentit Vucic që lidhet me anëtarësimin pa të drejtë vetoje.
Dokumenti trajton edhe përfshirjen e opozitës në punën parlamentare dhe angazhimet e palëve për të krijuar kushte për pjesëmarrjen e saj. Teksti përfshin angazhimin e mazhorancës për të siguruar kushtet e pjesëmarrjes së plotë të opozitës në veprimtarinë parlamentare dhe respektimin e kërkesave të saj në përputhje me standardet demokratike, Kushtetutën dhe Rregulloren e Kuvendit. Nga ana tjetër, opozita angazhohet të sigurojë pjesëmarrje të plotë në veprimtarinë parlamentare sipas po të njëjtat standarde. Të dyja palët angazhohen gjithashtu për forcimin e dialogut politik.
Si shenjë e përmirësimit të tonit mes forcave politike, gjatë fjalimit të Berishës u vërejt një episod i përzemërt: pas përfundimit të kohës në foltore, deputetët e shumicës i kërkuan që të largohej për të dhënë vendin për debate të tjera, ndërsa kreu i grupit të PS-së i kërkoi Peleshit që t’i jepte Berishës edhe një minutë nga koha e socialistëve.
