FIFA po shqyrton forcimin e kompetencave të arbitrave para Botërorit të këtij viti për të kufizuar mbajtjet midis futbollistëve dhe për të parandaluar rrëmujën në zonën e penalltisë, veçanërisht gjatë goditjeve standarde. Qëllimi i inicativës është të sjellë më shumë rregull në situatat që shpesh rezultojnë kaotike, duke aplikuar një linjë më të ashpër që është komunikuar tashmë trajnerëve të 48 skuadrave pjesëmarrëse të turneut.
Sipas The Times, drejtuesit e arbitrazhit po shqyrtojnë edhe mundësinë e imponimit të sanksioneve më të rënda ndaj skuadrave që ndërhyjnë duke bllokuar ose mbajtur fanelat gjatë goditjeve të këndit ose goditjeve të dënimit. Një nga hipotezat që po diskutohet është edhe akordimi i një goditje dënimi në favor të skuadrës sulmuese në rast se një goditje këndi dështon për shkak të një faulli të mëparshëm kundër sulmuesit.
International Football Association Board (IFAB), institucioni që ka mandat për të ndryshuar rregullat e lojës, do të trajtojë këtë çështje në një kuadër më afatgjatë, por ndryshimet nuk pritet të zbatohen përpara fillimit të turneut. Kështu, çdo modifikim formal i rregullave duhet të kalojë procedurat përkatëse dhe nuk mund të hyjë menjëherë në fuqi për Botërorin e ardhshëm.
FIFA nga ana e saj synon të ndërhyjë me kohë për të shmangur që fazat finale të garës të karakterizohen nga episode kontraverse. Si pjesë e këtij përpjekjeje, trajnerët e ekipeve kombëtare kanë marrë sqarime mbi mënyrën e interpretimit që arbitrat do të përdorin gjatë ndeshjeve: do të ketë tolerancë më të ulët ndaj bllokimeve të portierëve dhe një qëndrim më të ashpër ndaj grumbullimeve dhe ndërhyrjeve të paligjshme gjatë goditjeve standarde.
Nisma synon që, përmes zbatimit të rregullave ekzistuese me më shumë vendosmëri ose përmes ndryshimeve të ardhshme të rregullave, të zvogëlojë episodet e kontestimta dhe të rrisë qartësinë në situatat e ndërlikuara në zonën e penalltisë.
