Gjykata e Posaçme kundër Korrupsionit dhe Krimit të Organizuar ka dënuar ish-gardistin Zef Mali dhe Jemine Çoku për ushtrim të ndikimit të paligjshëm ndaj funksionarëve publikë. Prokuroria e Posaçme paraqiti për gjykim çështjen penale nr. 196, të vitit 2025, dhe gjykimi u zhvillua me rregullat e gjykimit të shkurtuar. Trupi gjykues i Shkallës së Parë përbëhej nga gjyqtarët Bib Ndreca, Alma Kodraliu dhe Etleva Deda, të cilët me vendimin nr. 39, datë 12.05.2026, morën vendimet e mëposhtme.
Zef Mali u deklarua fajtor për veprën penale “Ushtrimi i ndikimit të paligjshëm ndaj personave që ushtrojnë funksione publike”, në bashkëpunim, sipas nenit 245/1, paragrafi 4 dhe 25 të Kodit Penal, dhe u dënua fillimisht me 2 vite e 6 muaj burgim. Në aplikim të nenit 406/1 të Kodit të Procedurës Penale, dënimi i ulet me 1/3, duke përfunduar në 1 vit e 8 muaj burgim. Gjykata vendosi gjithashtu, në bazë të neneve 30/5 dhe 35 të Kodit Penal, heqjen e së drejtës për të ushtruar funksione publike për një periudhë pesëvjeçare.
Jemine Çoku u shpall po ashtu fajimtare për të njëjtën vepër penale, sipas nenit 245/1, paragrafi i dytë të Kodit Penal, dhe u dënua me 1 vit burgim. Në zbatim të nenit 406/1 të K.Pr.Penale, dënimi u ul 1/3 duke shkuar në 8 muaj burgim, ndërsa Gjykata, në aplikim të nenit 52/a/1 të Kodit Penal, urdhëroi përjashtimin e saj nga vuajtja e dënimit.
Sipas vendimit, provat materiale do të mbeten për llogari të dosjes së ndarë (neni 190 K.Pr.Penale), ndërsa CD-të e përgjimeve dhe të kompanive celulare mbeten pjesë e fashikullit gjyqësor (neni 224 K.Pr.Penale). Shpenzimet hetimore dhe gjyqësore ngarkohen solidarisht të pandehurve. Kundër vendimit lejohet ankim brenda 15 ditëve në Gjykatën e Posaçme të Apelit për Korrupsionin dhe Krimin e Organizuar.
Në përshkrimin e faktit penal, sqarohet se Zef Mali, kur mbante detyrën e oficerit të Shtabit për Menaxhimin e Forcave në Gardën e Republikës, në bashkëpunim me Kreshnik Domin, i kanë kërkuar dhe marrë nga e pandehura Jemine Çoku shumën prej 20.000 eurosh, duke i premtuar përshpejtimin e procedurave dhe veprimeve juridike për ekstradimin e vëllait të saj, Kujtim Çeliku, nga Turqia drejt Shqipërisë. Top Channel.
